Les viès pîr’ ont leus place ès l’histoère,
Didins chaqu’ ville i gn’a des monumints
Qui sont d’mèrés po nos rappèler l’gloère
Di nos aïeux, di nos bons vîx parints !
Noss’ vîx Nameur à ses èffants mosterre
Comme on’ sov’nance one èglige on clotchî !
Quand on l’rivoèt on a l’cœur qui s’risserre,
Choûtant les cloqu’ on d’meûr’ tot à sondgî !
Gn’a l’tiess’ qui bat l’berloque
On a l’cœur tot trônnant,
Quand on ètind l’gross’ cloque
Do vîx clotchî d’St d’Jean.
Quand on ètind l’gross’ cloque
Do vîx clotchî d’St d’Jean.
Ès voèyadgeant on voèt bin des affaires,
Ca des biatés gn’enna po z’assoti !
Vaici, vaila, ces novellès z’histoères
On est vraimint ribattu d’les r’waitî !
Mais l’émotion qui chonn’ todi novelle,
C’est l’cenn’ qu’on r’sint tot suite ès z’arrivant,
Et quand l’vîx cloqu’ di St d’Jean nos appelle
Li cour si r’moue et toctée ès l’choûtant !
Gn’a l’tiesse qui bat l’berloque
On a l’cœur tot trônnant,
Quand on ètind l’gross’ cloque
Do vîx clotchî d’St d’Jean !
Quand on ètind l’gross’ cloque
Do vîx clotchî d’St d’Jean !
Chaqu’ côp dispiette on écho dins noss’ t’âme !
Viès sov’nanc’ qui vol’-nu s’rèvèyî !
Et si doux son nos boute au cœur one flamme,
Fleu di d’jôness’ qui vint nos ragayî !
Bin èri d’li, l’a fallu qu’on èsvouïe,
Mais di s’d’jônn’ timps on s’sovint co po ça !
On est todi bunaug’ quand vint on r’vouïe
Li vîx clotchî, qui rappell’ ci timps-là !
Gn’a l’tiess’ qui bat l’berloque,
On a l’cœur tot trônnant,
Quand on ètind l’gross’ cloque
Do vîx clotchî d’St d’Jean !
Quand on ètind l’gross’ cloque
Do vîx clotchî d’St d’Jean !