Quand on-z-èst célibataîre
I faut quéque chôse po s’ distraîre :
Gn-a dès cias qu’in.mait lès pinsons
Ou lès linèts ou lès pidjons ;
Dès-ôtes fiait dès gayoles, aus pus grandes, au pus bèles
Dj’aî conu on brâve ome qu’avait dès tôrturèles.
C’èstait on vî curè,
I lès lèyait volè
Dins s’ tchambe en lîbèrtè.
Li djeû plaîjait aus bièsses.
Èt gn-avait todi one su si spale ou su s’ tièsse
On djoû il avait invitè
Sès confréres à dînè,
Dispû l’ dwèyin jusqu’au vicaîre.
Li mèskène apwarte li soupiére,
On s’ mèt à tauve, on dit l’ bènèdicitè,
Maîs, come si l’ diâle l’avait tentè
One tôrturèle avole bin rate
Èt su l’ bwârd do l’ soupiére vint postè sès deûs pates.
Ci qu’èlle a faît dins l’ sope, dji vos l’ done à d’vinè
Li mèskène crîye on côp come s’ on l’avait stran.nè :
« — Vilin.ne charogne ! Man.nète salope !
« Mi qu’avait faît one si bone sope !…
« Qué displaîji, Monsieû l’ curè !
« Qu’alans-dje div’nu ? Qui faut-i fè ?…
— « È bin, rèspond l’ brâve ome, purdans pacyince, Marîye ;
« Ca, maugrè nosse guignon, i faut co bin qu’on rîye.
« Si nos n’avans pont d’ sope, nos bwèrans on côp d’ pus. »
« Apwartoz-nos l’ viyande èt nos n’è causerans pus. »
— « Ô li ! Ç’ man.nète bièsse là, èle serè co pârdonéye ! »
Dit l’ mèskène en sôrtant
« Èt mi, s’ dj’è fiais ostant
On m’ flanquerait su l’ pavéye ! »
— « Djè l’ vu bin crwêre, rèspond l’ Dwèyin,
Ca dj’ pinse qui vos l’ mèriterîz bin. »