Li p'tit ri, tot cråmignonant
å-d'-triviès dès prés mayetés d' fleurs,
broke oute di tot,
come on djonne polain qu'est d'lahî.
Ine rotche li djinne : rade i l'ascohe
èt, tot samant, plonke èl basse gofe
qui l' treûte riqwîrt
Pwis, tot d'on côp, påhûle et come po s' ripwèser,
s'alårdjih bin a si-åhe èt, sins brut, come di l'ôle,
c'è-st-a ponne s'i lètche lès caywês.
Mins, d'mani keû, c'è-st-impossibe.
Al vole i rik'mince sès pidjoles,
mousse dizos lès bouhons èt, di s' doûs glaw'zinèdje,
ènonde tos lès-oûhês, qui s' mètèt-st-a tchanter
tot rèpètant-st-ås fleurs lès doûcès galguizoûtes
qu'èlzî a raconté.
Anfin, vo-l'-chal divant 'ne colîre :
il î roufèle come on pièrdou,
po s' lèyî goter d'ine plinte pèce
è vèvî, qui raspâgne sès-êwes
po fé toûrner l' rowe dè molin.
Li pan dè bon Diu (Haust, 1924)/XIV
Ciste ouve ci egzistêye eto divins ds ôtès ortografeyes : Rifondou.Li ri