Dès fèmes, dès-omes di totes lès-âdjes, dès ptits-èfants ki dès halcotîs cotchèssenut so lès vôyes pa cint d’mêyes. Cès halcotîs la lzî ont hapé leûs caurs, leûs papîs èt bouter l’ feû a leû viladje. Dès-efants d’ dîh ans k’ont vèyou mascôrder leû famile èt k’ c’èst miråke si zèls ènn-ont chapé. Dès fèmes k’on z a-st årgouwé [agresser] èt fwârcî. Lès magneûs d’ blanc [proxénètes] k’andoûlèt [enjôler] lès djônès båcèles èt lzî promète dè souke a locêyes èt ki lès vindront tchêr èt vilin come dès bièsses a dès vîs måragostants ki s’ rafiyèt ddja. On z a vèyu ça avou l’ Roumanie, èdon. Et dispôy li « vî agra », cès vîs bouks la sont co pus-ènondés. Et nos n’ savans né co totes lès crapulerêyes ki lès moudreus da Milosevitch ont fêt a cès målèreus la.
Lès Croates rîyenut d’ çou k’on fêt ôdjourdu ås Serbes. Ayîr, lès Serbes riyîne di çou k’ Milosévitch féve èdurer å Kosovars. I n’a nole gloriole a mêsbrujî dès pôvriteûs k’ n’ont nole rivindje. Ca l’ bouria dès Balkans n’a né rawårdé lès bombes po mårgougnî sès wèzins. I n’ fåt måy rîre d’on må tchåssî, i n’a dès savates po tot l’ monde.
Poqwè a t on ratindu on mwès po spiyî l’ mohone da Milosèvitch ? C’èst l’ prumi djoû kèl faléve sikèter. Qwand on z a bombardé l’ ambassade di Chine, i n’a-st-avu qwate touwés. Onk c’èsteût dèdja d’ trop. Lès Chinwès ènn-ont miné eune arèdje. Mins, zèls, sont-i si spèpieûs avou leûs djins ? Paski po lès bons dreûts dèl djint [les droits de l’homme] ! Èt l’ Tibet d’abôrd ?
A Strasbourg, Le Pen a hågnelé [montré] eune pancarte « Non aux frappes ». I pout bé rmostrer l’s-ôtes, ci mådrê la, lu ki nôye l’ègzistince dès tchambes a gaz ki lès nazis î ont stofè dès cints d’ mêyes di djins. Èt k’ lès baligants kèl sutenèt vont pihî so dès tombes di Juifs èl Allemagne. C’èst todi l’ crama ki lome li tchôdron neûr cou.
Ki l’ bouria dès Balkans tådje dè mårtiriser lès Kosovars èt l’harlème s’arètêyrè sol côp. Mins k’ n’a- t-i d’ bon a ratinde d’eune crapule ki n’a d’ keure di s’ peûpe. Seûye-t-i èl Serbie, å Kosovo èt tot-avå l’ dègne, c’èst todi li ptit k’on spotche. « Lorsque les hommes vivront d’amour, il n’y aura plus de misère… mais nous, nous serons morts mon frère » tchante t-i Gilles Vigneault.