« Poqwè qu’ t’è vas ? Dîj ans qu’ n’-n-èstans èchone. Dji so-st-au r’pintant, nosse chére feume, mins on n’è va nin djus di s’ min.nadje après dîj ans. Nosse bloûwe bole ni toûne nin come ça. Totes lès gazètes vos l’ dîront. On-z-è va après quinze djoûs, quand’ ça n’ va nin. Afîye après sèt’ ans, dins cès cas là, qu’on n’ sét pont awè d’èfant : mins faut-i co awè ç’ raison là. Èt on vos d’mand’rè cor on papî do médecin po l’asprouver, mins jamaîs au d’bout d’ dîj ans. Oyi, Monique, djè l’ sé bin qu’ dj’a yeû branmint dès manques, qui dj’ n’a nin todi stî drwèt dins mès botes, qui nos r’chonans d’pus à dès vwèsins qu’a dès galants. I faut jusse qui vos sayerîz do comprinde qu’i-gn-a dès rûjes dins totes lès copes, qui nos d’vrin’ trover one saqwè d’ noû po r’tchaufer nos fricasséyes di bètchs, qui Rome n’a nin stî batî sur on djoû, qui lès soudârds amèrikins ont continouwé à s’ bate, zèls à « Omaha Beach » pad’vant lès rèfwârcîs bètons, pad’zo lès côps d’ fusik, au d’zeû dès bombes catchîyes dins l’ sauvion, dins d’ l’aîwe èdjaléye, èt qu’i fieûve tant sèrant por zèls. C’èst l’ guêre, Monique. I-gn-a pus qu’ saquants mètes, nos sèrans yute di d’ça. Ça n’ pout pus durer ? Sîfait, on va durer, po noste èfant ! Asteûre qui dj’a bachî m’ culote, qui dj’a ralumé one sitwèle dins nosse trau d’ nûton, donoz m’ seûl’mint li mwinre sudjèt po qu’ ça n’ vôye nin pus lon yinte nos deûs ? In ? Donoz m’è onk ? Rin qu’onk ? »
Èlle èsteût paujêre au d’la. Èlle aveût s’ bia visadje, èle n’èsteût nin gaîye avou, mins on p’tit sorîre quand’ minme. Èlle a lèvé sès-ouys èt m’ razouyî come one dimwèsèle di scole pad’vant on’ èfant qu’on n’è sâreûve pus rin fé.
Èle m’ènn’âreût polu avancî dès cints d’ raîsons. Dès bounes èt dès mwaîjes. Damadje por mi, minme lès bounes ni m’ârin’ yeû r’nètî. Èlle ènn’a prins one èwarante :
« Félik, èst ç’ qui t’ pôreûs, sins ti r’toûner, mi dîre li coleûr di nosse fastrou ? Non.na, nin dandjî di t’ rimouwer po ça, por on côp dins t’ vikaîrîye ni saye nin di m’ balter. Ça faît quatre ans qu’ nos l’avans ç’ fastrou là, dji vôreû bin qu’ ti m’ direûs s’ coleûr. »
Bièsse di grègne di fastrou. Nin moyin do rèche di cès coleûrs là, branmint d’ trop por on pôvre ome come mi.
Dji conè d’ tièsse lès coleûrs dès mayots do « Standard » ; c’èst do rodje. Lès cias dès Brésiliyins, c’èst do djane. Li nîve ; èlle èst blanke, lès broûs satchenut su l’ brun’. Quand’ i faît solia, c’èst tot bloûw. Mins l’ fastrou ?
Dj’a sayî : « Bole di feu. »
Èle m’a rèspondu : « Clér ciradje »
« Bole di feu satchant su l’ clér ciradje » dj’a t’nu bon, « T’ès seûre qui ç’ n’èst nin bole di feu satchant su l’ clér ciradje ? »
« Félik, dji m’è va. »
Èle m’aveût dit ça tote djintîye.
Dispôy ci djoû là, qui ça seûye n’importe èwou, minme po nin lonmint, minme po deûs minutes, i n’ passe nin on mouchon è l’aîr qui dj’ nè l’ veûye : labèle lès coleûrs dès fastrous !…