C’èsteût l’nut′ dè Noyé, li mame féve dès boûquètes,
èt tos lès p’tits-èfants, rassonlés dilé l’feû,
rin qu’à houmer l’odeûr qui montéve dèl pêlète,
si sintît l’êwe al boque èt s’ ralètchît lès deûts.
Qwand on costé dèl påsse èsteût djusse à l’îdèye,
li mame prindéve li pêle, èl hoyéve on p’tit pô,
èt pwis houp ! li boûquète è l’air féve ine dimèye
èt d’vins l’mitant dèl pêle ritouméve cou-z-å haut.
— Lèyîz-m’ on pô sayî, brèya li p’tite Madjène,
dji wadje dèl ritoûrner d’adreût dè prumî côp.
Vos-alez vèyî, mame ! Èt volà nosse glawène
qui prind l’pêle à deûs mains, qui s’abahe on p’tit pô,
èt rouf ! di totes sès fwèces èlle èvole li boûquète…
Ele l’èvola si bin qu’èle n’a måy ritoumé.
On qwèra tos costés, so l’årmå, po-drî l’pwète,
on n’ritrova måy rin. Wice aveût-èle passé ?
Tot l’ monde s’èl dimandéve, èt lès k’méres dè vinåve
si racontît tot bas, l’al nut′, åtoû dè feû,
qui c’èsteût sûr li diâle qu’èsteût catchî d’zos l’tåve
èt qui l’aveût magnî sins fé ni eune ni deûs…
L’iviér passa. L’osté ramina lès vèrdeûres
èt lès fièsses di porotche ås djoyeûs cråmignons.
Tot l’monde aveût dèdja roûvi ciste avinteûre,
qwand li mére d’a Madjène fat r’blanki sès plafonds.
Volà don l’ bwègne Colas, blankiheû sins parèy,
qu’arive avou sès breûsses, sès håles è sès sèyês.
I k’minça dè bodji lès p’titès bardah’rèyes
qu’èstît avå l’ manèdje ; i wèsta lès tåvlês
qui pindît so lès meûrs ; pwis, montant so s’ halète,
i d’pinda l’grand mureû qui hågnîve so l’ djîvå…
Èt c’èst podrî l’mureû qu’on r’trova nosse boûquète,
qu’èsteût là d’pôy sî meûs, co pus deûre qu’on vî clå,
neûre come on cou d’tchapê, reûde èco pé qu’ine bèye,
frèzèye come ine vèye catche èt, d’zeûr di tot çoulà,
tote coviète di strons d’ mohe, èt tél’mint tchamossèye
qu’èlle aveût dèx poyèdjes co pé qu’in-angora.
Li boûkète èmacralêye
Ciste ouve ci egzistêye eto divins ds ôtès ortografeyes : Rifondou walon.Li boûkète èmacralêye
Li boûkète èmacralêye