Li bîje èt l’solê estint en margaye. Èt tchic èt tchac, èt tchic èt tchac…
One paskéye qui n’éve pon d’fin dji vos dis paski chakin d’zèls dijéve qu’il estéve li pu fwârt.
Mais on bè djoû, vola qui rèscontrè on voyèdjeû qu’arivéve pa l’train d’Maurloye èt qu’a dischindu a l’gâre di Jmele.
Mon dieû todi, qu’éne apotikêre ! Qu’il éve mau l’aîr avou ses tchfès èmacralès ! Il estéve droledimint agayaulè èt tot ravautchè din on vî paltot trawè pa les mites. On vraî bribeû !
« Metans nos d’acwârd » disti onk des deûs lascars. « Li prèmî k’arive a fwarcî l’ome di Maurloye à rsatchè s’paltot sèrè rwaîtè come on vraî castâr ».
Adon, quène arèdge mes djins, li bîje a cmincè à chuflè di totes ses fwaces èt a staurè tos les cantchas d’Célina.
« Maria dei, qu’éne atèlée vaî-ci ! »
Mais, li pus qu’èle chufléve, li pus qui no’s t’ome tron.néve èt s’racrapotéve din s’cazake.
À l’fin dès fins, li bîje, tote disbautchée a lèyi toumè les brès.
« Ah, c’est po l’djâle ! » distele
« Dji n’ai nin plu li fè raustè s’paltot, non di djo ! »
No’s solê ni fiéve pon d’bin, mais i n’estéve nin bièsse èt il èn a profitè po cmincè à lûre, à lûre télmint qu’il a metu ses nwârès bèrikes po n’in ès li-même asbleuwi.
One miète pu taurd, l’ome di Maurloye, qu’éve ossi tchôd qu’din on for, a fini pa s’dismoussè.
Ça fait insi qui l’bîje a stî fwarcée d’ricnoche qui l’solê éve gangnè ét qui s’grandiveû-là estéve vraîmint l’pus fwârt.
L’ eredjistrumint a stî l’ ouve da Lucyin Mahin k’ end a tos les abondroets.
Il est oyåve vaici.