Li bèrce est d'mèréye asto d'nosse lé, dispû des djoûs et des samwinnes
Qui nos trin-nans l'bolet d'nosse pwinne,
Li bèrce est là, garnîye, presse. Elle ratind
Qu'on vègne î r'mète coutchî li p'tit. Mi p'tit gamin !
Elle ni comprind nin lèye
Pokwè qu'on n' lî lèye pus ossî l'somèye
Di l' èfant, l'rèfârduler din ses brès.
Elle nè l'ètind pus ramadjî. Pokwè ?
Ayîr, advant-îr, et co mwins côps, dj'a v'nu r'trouver l'moman
Somadjant, djèmichant, brîjîye, asglignîye
Del cwachûre qui n' si r'clorê jamais.
Pôve moman ! aflachîye, les mwins nukèyes dins s'choû, elle brait
Elle brait au pîd del bèrce vûde, vûde come mi cœûr, vûde come mi tiesse
Qui n'arive nén à trouver l'dgèsse
Qu'i faurève fé po rapaujî l' chagrén.
Audjoûrdu, c'est mi qui véns m'achîre asto
Li front dins l' mwin, l' coûde su les gngnos.
Djel riwès, l' minton à fossètes …
André ? mi p'tit ? Fioz' m' ène risète ?
Et sins sondjî
Vola qu'dji m' mets à fer ossî
Nan nan ninète
Les p'tites pouyètes …
Mon Dieu ! Si m' pôve feume m' ètindait !
Allons papa ! Rifrote tes ouyes. Vàs-è.
Li tite esteut e grandès letes et må rcôpé (L BÈR CE VUDE). Les accints ont stî rmetous a l' assorlon di leu-z ortografeye ådvins do tecse. L' årtike est riscrît e s' plinne cogne « li », come dins l' tåve di ç' limero la des Cayés walons.