C’ est a ç’ moumint la ki li rnåd aparexha.
- Bondjoû, derit i li rnåd.
- Bondjoû, responda-t i oniestrumint li Ptit Prince e s’ ritournant. Mins i n’ veya rén.
- Dji so vaici, derit ele li vwès, padzo l’ melêye.
- Kî-y estoz ? derit i li Ptit Prince. Vos estoz bén nozé.
- Dji so-st on rnåd.
- Vos vnoz djouwer avou mi ? dimanda-t i li Ptit Prince. Dji so si disbåtchî.
- Dji n’ såreu djouwer avou vos, dji n’ so nén acmoirdou.
- A ! dji vos dmande escuze, fijha-t i li Ptit Prince.
Mins après awè bén tuzé, i derit :
- Cwè çki ça vout dire « acmoirdou » ?
- Vos n’ estoz nén did ci, vos, derit i li rnåd. Après cwè cachîz vs ?
- Dji cache après des djins. Cwè çki ça vout dire « acmoirdou » ?
- Les djins, derit i li rnåd, les djins ont des fiziks eyet i tchesnut. C’ est foirt displaijhant ! Il aclevnut des poyes eto. C’ est tot çou k’ i gn a d’ bon dins les djins. Vos cachîz après des poyes ?
- Neni, dji cache après des soçons. Cwè çki ça vout dire « acmoide » ?
- C’ est ene sacwè k’ on-z a rovyî dtrop. Ça vout dire « fé des loyéns ».
- Fé des loyéns ?
- Oyi. Por mi, vos n’ estoz co k’ on roufion fén parey a cint meyes ôtes roufions. Al copete do martchî, dji n’ a nén dandjî d’ vos. Et vos, vos n’ avoz nén dandjî d’ mi nerén. Por vos, dji n’ so k’ on rnåd fén parey a cint meyes ôtes rinåds. Mins si vos m’ acmoirdoz, nos årans mezåjhe d’ onk l’ ôte. Por mi, i gn årè k’ onk come vos totavå l’ monde. Por vos, i gn årè k’ onk come mi pattavå l’ monde.
- Dji cmince a comprinde, dijha-t i li Ptit Prince. I gn a ene fleur… Dj’ a l’ idêye k’ ele m’ a-st acmoirdou.
- Ça s’ pout bén. On lzès voet totes, dissu nosse Tere.
- O ! Ça n’ est nén sol Tere.
Li rnåd esteut sbaré, shonnéve-t i :
- So ene ôte planete ?
- Oyi.
- Gn a-t i des tchesseus, so cisse planete la ?
- Neni.
- Vola yåk d’ interessant ! Et des poyes ?
- Neni.
- Rén n’ est a l’ idêye totoûte, sospira-t i li rnåd.
Mins i rivna so si idêye :
- Mi vicaedje, c’ est todi l’ minme rime-rame. Dji tchesse les poyes, les djins m’ tchesnut. Totes les poyes si raviznut eyet totes les djins s’ raviznut. Ça fwait ki dji m’ anoye on pô. Mins si vos m’ acmoirdoz, ça serè come on novea solea dissu m’ vicaedje. Cand dji vs ôrè roter, ça n’ serè nén come avou ls ôtes. Cand dj’ etind roter les ôtes, dji m’ muche dizo tere. Cwand dji vs etindrè roter, vos, ça m’ frè moussî foû di m’ terêye, come si dj’ ôreu del muzike. Et pu, wai ! Vos veyoz, vaila, les tchamps d’ frumint ? Dji n’ magne pont d’ pwin. Ça fwait k’ por mi, li frumint, ça n’ sieve a rén. Les tchamps d’ frumint ni m’ rapinsnut rén. Et ça, c’ est disbåtchant ! Mins vos, vos avoz des tchveas coleur di l’ ôr. Ça fwait k’ ça serè mirlifike, cand vs m’ åroz-st acmoirdou ! Come li frumint a l’ coleur di l’ ôr, i m’ frè sovni d’ vos. Et dji choûtrè voltî li brut do vint dins les frumints.
Li rnåd s’ taijha et s’ riwaita-t i lontins li Ptit Prince.
- Si vs plait, acmoirdoz m’ ! dijha-t i.
- Dji vou bén, mi, responda-t i li Ptit Prince, mins dji n’ a waire di tins. Dj’ a des camaerådes a discovri eyet mwintès afwaires a cnoxhe.
- On n’ såreut cnoxhe ki les sacwès k’ on-z acmoide, fijha-t i li rnåd. Les djins, metans, i n’ ont pus l’ tins di rén cnoxhe. Il acatnut des sacwès tote fwaites å martchand. Mins come i gn a noû martchand d’ camaerådes, les djins n’ ont pupont d’ camaerådes. Si vos vloz on camaeråde, acmoirdoz m’ !
- Cwè çk’ i m’ fåt fé ? dimanda-t i li Ptit Prince.
- I fåt-st awè bråmint del pacyince, responda-t i li rnåd. Po comincî, vos vos ashiroz ene miete erî d’ mi, insi, dins les yebes. Dji lûtchrè d’ cresse di vosse costé eyet vos n’ diroz rén. Avou l’ lingaedje, on s’ brouye co åjheymint. Mins tchaeke djoû, vos vs pôroz ashir on pô pus près.
Li leddimwin, li Ptit Prince rivneut.
- Vos årîz dvou rivni al minme eure, dijha-t i li rnåd. Si vos vnoz, metans, a cwatre eures di l’ après-nonne, dji cminçrè ddja a-z esse binåjhe aviè troes eures. Å pus l’ eure avançrè-t ele, å pus dji m’ sintrè binåjhe. A cwatre eures, dji pestelrè ; dji serè so des tchôdès cindes : dj’ apudrè a cnoxhe li pris do bouneur ! Mins si vos vnoz tolminme cwand, dji n’ sårè måy a kéne eure dji doe moussî m’ cour. I fåt des rites.
- C’ est cwè d’ on rite ? dimanda-t i li Ptit Prince.
- Ça eto, c’ est ene sacwè k’ on roveye ditrop, responda-t i li rnåd. C’ est çou ki fwait k’ on djoû n’ est nin l’ minme ki ls ôtes djoûs, k’ ene eure n’ est nin l’ minme ki les ôtès eures. Mes tchesseus, metans, il ont on rite. Li djudi, i dansnut avou les cmeres do viyaedje. Do côp, li djudi, c’ est on clapant djoû ! Dji va pormoenner do costé del vegne. Si les tchesseus dansrént tolminme ké djoû, tos les djoûs serént les minmes, dji n’ årë måy nou condjî.
Ça fwait ki li Ptit Prince acmoirda li rnåd. Et cwand fourit po ndaler :
- A ! derit i li rnåd. Dji tchoûlrè.
- C’ est vos l’ fåte, dji n’ vos voleu pont fé d’ må, mins vos avoz volou ki dji vs acmoirdaxhe.
- Oyi, ça.
- Mins vs alez braire !
- Oyi, ça, fijha-t i li rnåd.
- Mins do côp, vos n’ avoz rén wangnî !
- Siya, dj’ a wangnî ene sacwè, plamour del coleur des frumints.
Adon, i derit co :
- Alez rvey les rôzes. Vos compudroz k’ i gn a k’ ene come li vosse å monde. Vos rvénroz po m’ dire adiè, eyet dji vs bistocrè avou on scret.
Li Ptit Prince rala vey les rôzes.
- Vos n’ rishonnez nén m’ rôze, derit i, vårmint ; vos n’ estoz co rén. Nolu n’ vos a-st acmoirdou eyet vos n’ avoz co acmoirdou nolu. Vos estoz come mi rnåd esteut. Ci n’ esteut k’ on rnåd parey a cint meyes ôtes. Mins dj’ a fwait camaeråde avou lu, ey asteure, i gn a k’ onk come lu å monde.
Sol côp, les rôzes estént djinnêyes.
- Vos estoz beles, mins vos estoz vudes, dijha-t i. On n’ såreut mori por vos. Ene djin come ene ôte ki pasreut avår ci pinsreut surmint ki m’ rôze vos ravize. Mins a leye tote seule, ele conte dipus k’ vozôtes tertotes, puski c’ est leye ki dj’ a raiwé. Puski c’ est leye ki dj’ a bouté padzo s’ bole di veule. Puski c’ est leye ki dj’ a metou å rcoe dizo s’ toetea. Puski c’ est leye ki dj’ a touwé ses halenes (a pårt deus troes po dire d’ awè des påwions). Puski c’ est leye ki dj’ a choûté k’ ele si plindeut, ou k’ ele fijheut del rinflêye, ou minme, pa des côps, k’ ele si taijheut. Puski c’ est m’ rôze da minne.
Et i rivna dlé li rnåd.
- Adiu ! dijha-t i.
- Adiu ! dijha-t i li rnåd. Vocial mi scret. Il est foirt simpe : on n’ voet bén k’ avou s’ cour. Çou ki conte po do bon, on nel sait vey avou ses ouys.
- Çou ki conte po do bon, on nel sait vey avou ses ouys, repeta-t i li Ptit Prince po s’ sovni.
- C’ est l’ tins k’ vos avoz pierdou po vosse rôze ki fwait k’ ele conte tant por vos.
- C’ est l’ tins ki dj’ a pierdou po m’ rôze, fijha-t i li Ptit Prince, afén s’ di s’ sovni.
- Les djins ont rovyî cisse vraiye la. Mins vos, vos nel divoz nén rovyî. Vos divnoz responsåve po tofer di çou k’ vos avoz-st acmoirdou. Vos estoz responsåve di vosse rôze.
- Dji so respon’såve di m’ rôze, repeta-t i li Ptit Prince por lu s’ sovni.
Hårdêye difoûtrinne