Li Ptit Prince gripa so ene hôte hôte cresse. Les seulès montinnes k’ il aveut cnoxhou, c’ esteut ses troes volcans, k’ arivént a ses djnos. Li moirt volcan lyi sierveut d’ passet. «D’ al copete d’ ene sifwaite cresse, sondjive-t i, dj’ avizrè d’ on côp d’ ouy tote li bole eyet totes les djins ki dmorèt dsu. »
Mins i n’ aperçuva rén k’ des tiesses di rotches, bin rawijhêyes.
- Bondjoû, derit i po vey.
- Bondjoû… bondjoû… bondjoû… end ala-t ele li response.
- Kî-y estoz ?
- Kî-y estoz… kî-y estoz… kî-y estoz… fijha-t ele li response.
- Soeyoz mes camaerådes, dji so mierseu.
- Dji so mierseu… mierseu… mierseu… derit ele li response.
« Li kéne drole di bole ! pinsa-t i a ç’ moumint la. Elle est tote setche, tote betchowe, tote salêye. Eyet les djins n’ ont pont d’ mådjinåcion. I n’ fijhèt ki do repeter çou k’ on lzî dit. So m’ bole da minne, dj’ aveu ene fleur : ele djåzéve tofer li prumire. »
Hårdêye difoûtrinne