(prononçaedje eterpayis
mins, pacô, gn a on mot di rcandjî)
Li cénkinme planete esteut foû drole. C' esteut l' pus ptite. I gn aveut djusse del plaece assez po-z î stitchi ene lampe et èn esprindeu d' lampes. Li ptit prince ni parvineut nén a comprinde a cwè çki ça poleut bén siervi, ene sadju e cir, so ene bole sins måjhon eyet sins djin, ene lampe eyet èn esprindeu d' lampes. Portant, i s' derit dins lu minme: «motoit bén ki cist ome la est absurde. Mågré ça, i n' est nén si absurde ki li rwè, ki l' grandiveus, ki l' businessman ou ki l' sôleye. Do moens si ovraedje a-t i on sins. Cwand il esprind s' lampe, c' est come s' i freut skepyî ene sitoele di pus, ou ene fleur. Cwand i distind s' lampe, ci côp la, çoula edoime li fleur ou li stoele. C' est on djoli pasmint d' tins. I gn a di l' avance, dwai, puski c' est djoli.»
Cwand il avna sol planete, i salouwa l' esprindeu a môde di djin:
- Bondjoû. Douvént est çki vos vnoz do distinde vosse lampe?
- C' est les ôres, responda-t i l' esprindeu. Bondjoû.
- Cwè çki c' est d' ça, les ôres?
- C' est do distinde mi lampe. Bonswer.
Eyet i l' ralouma.
- Mins douvént çki vos vnoz del raloumer?
- C' est les ôres, responda-t i l' esprindeu.
- Dji n' comprind nén.
- I gn a rén a comprinde, derit i l' esprindeu. Les ôres, c' est les ôres. Bondjoû.
Et i distinda s' lampe.
Adon, i rsouwa s' front avou on mocwè a rodjes cwårés.
- C' est on deur mestî ki dji fwai, sav'. Dins l' tins, c' esteut raizonåbe. Dji distindeu å matén, eyet dj' alouméve a l' anuti. Dj' aveu l' restant del djournêye po m' ripoizer, eyet l' restant del nute po doirmi!
- Et dispoy adon, les ôres ont candjî?
- Les ôres n' ont nén candjî, derit i l' esprindeu. C' est djustumint ça, li scorion! Li bole, d' ene anêye a l' ôte, toûne todi pus roed. Eyet les ôres, zels, i n' candjèt nén!
- Et après, derit i li ptit prince?
- Et après? Asteure, ele fwait on tour tote les munutes, dji n' a pus nén ene segonde po m' ripoizer. Dj' esprind eyet distinde ene feye tote les munutes.
- Vola ene sacwè d' comike! Les djoûs, so vosse planete, durèt ene munute!
- I gn a rén d' comike la dvins. Vola ddja on moes ki nos cåzans eshonne.
- On moes?
- Oyi. Trinte munutes. Trinte djoûs! Boune nute!
Eyet i resprinda s' lampe.
Li ptit prince el riwaita: i veyeut voltî cist esprindeu d' lampes, si fidéle a ses ôres. I s' sovna des soleas djus ki, lu minme, il aléve vey, i gn a lontins, tot saetchant s' tcheyire. I vola dner on côp d' mwin a s' camaeråde:
- Savoz bén cwè! Dji cnoxhe on moyén por vos vos rpoizer cwand vos vôroz!
- Djel vou sins lachî, derit i l' esprindeu.
Ca on pout esse, d' on minme côp, fidéle eyet nawe.
- Vosse bole est si ptite, derit i li ptit prince, ki vos e savoz fé l' tour e troes asdjambleyes. Vos n' avoz k' a roter doûçmint, po dmani tofer å solea. Cwand vos vs vôroz rschaper, vos n' åroz k' a roter! Insi, li djournêye deurrè ostant k' vos vôroz.
- I gn a waire d' avance. Mi, çou ki dj' inme bén dins l' veye, c' est do doirmi.
- Pont d' tchance, derit i li ptit prince.
- Pont d' tchance, derit i l' esprindeu. Bondjoû. Et i distinda s' lampe.
«Ci la, sondja-t i li ptit prince, come i porshuveut s' voyaedje pus lon, ci la, tos ls ôtes el riwaitrént di d' hôt: li rwè, li grandiveus, li sôleye, li businessman. Portant, c' est l' seul ki n' duvreut nén fé rire di lu, a mi idêye. C' est télcôp pask' i gn a k' lu ki s' ocupe d' ene sacwè d' ôte ki d' lu minme.»
Il a fwait on sospir di rgret.
«Ci la, pinsa-t i eto, c' est l' seul ki dj' åreu savou fé camaeråde avou. Mins s' planete est pår trop tchote. I gn a nén del plaece assez po deus.»
Çu k' li ptit prince ni oizeut avower, c' est k' il aveut l' tins lon après ene planete si beneye, aprume po les meye cwate cints cwarante solea djus totes les vint cwatre eures!