(prononçaedje eterpayis
mins, pacô, gn a on mot di rcandjî)
Sol planete après, il î dmaneut ene sôleye. Li ptit prince n' î a dmoré k' ene faflote, mins il end a stî tafwaitmint disbåtchî:
- Cwè fjhoz vaila? derit i al sôleye, ki n' motixheut nén, d' ashiou pa dvant ene driglêye di vudès botayes eyet ene driglêye di plinnès botayes.
- Dji boe, responda-t ele li sôleye, l' air d' onk ki s' dilåmentêye.
- Douvént boevoz? li dmanda-t i li ptit prince.
- Po rovyî, responda-t ele li sôleye.
- Po rovyî cwè? dimanda-t i li ptit prince, ki s' fijheut ddja må d' leye.
- Po rovyî ki dj' a honte, avowa-t ele tot-z abaxhant s' tiesse.
- Honte di cwè? vola-t i savu li ptit prince, afwaire do li dner on côp di spale.
- Honte di boere! acheva-t ele li sôleye, ki n' motixha pus.
Eyet li ptit prince end ala, tot sondjåd.
«Les grandès djins, vormint, sont foû foû droles», si djheut i dins lu minme, tins di s' voyaedje.