(prononçaedje eterpayis
mins, pacô, gn a on mot di rcandjî)
Sol deujhinme planete, i gn aveut on grandiveus:
- Â! â! Vola èn admirateur! criya-t i di d' lon l' grandiveus, cwand c' est k' il aviza li ptit prince.
Ca po les grandiveus, les ôtès djins sont des admirateurs.
- Bondjoû, derit i li ptit prince. Vos avoz on drole di tchapea.
- C' est po fé des tchapurneyes, responda-t i l' grandiveus. C' est po fé des tchapurneyes cwand on clatche dins ses mwins por mi. Målureuzmint, gn a jamwais nolu ki passe avår ci.
- Â? derit i li ptit prince sins comprinde.
- Clatchîz dins vos mwins, don! consia-t i l' grandiveus.
Li ptit prince clatcha dins ses mwins. Li grandiveus, tot fjhant des ådiyos', siclåtcha co ene tchapurneye.
- Vola ene sacwè d' pus plaijhant k' amon li rwè, derit i li ptit prince dins lu minme. Et i rataca a clatchî dins ses mwins. Adon, li grandiveus rataca a fé des tchapurneyes tot solevant s' tchapea.
Après cénk munutes, li ptit prince esteut hodé do rataker tofer li minme djeu:
- Et po fé tchaire li tchapea, kimint fwait on?
Mins l' grandiveus ni l' oya nén. Les grandiveus n' oyèt ki les louwandjes.
- Est çu di bon ki vos m' admirez si foirt?
- K' est çki ça vout dire admirer?
- Admirer, ça vout dire ricnoxhe ki dji so l' pus bea, li mî moussî, li pus ritche eyet l' pus sûti des omes so cisse planete chal.
- Mins vos estoz tot seu, so vosse planete!
- Fijhoz-me plaijhi, admirez-me tot l' minme!
- Dji vs admire, derit i li ptit prince tot hossant ene miete ses spales. Mins cwè çki çoula vs pout fé?
Et li ptit prince end ala.
«Oyi, ça: les grandès djins sont foû droles, vormint», si djheut i tot simplumint, tins di s' voyaedje.