C’ esteut li spot d’ èn ome di Tourene, k’ a egzisté podbon. Schoûtans Claude Snaps nos raconter ene paskeye k’ a divnou ene racontroûle foirt kinoxhowe dins ces payis la. A n’ nén croere !
Li Diåle da Canva, il a egzisté. Et c’ esteut on ptit cinsî, minåbe. Et i fjheut des toûs. Bråmint. Tolmonde end a cåzé.
On djoû, il esteut avou si ptit tchår haetchî pa ene vatche. Et il eva sol campagne di Bôvetchén a Nodebay. Et i londje li cinse Sumal, ene grosse cinse. Et l’ cinsî est la avou ses vårlets, dins l’ coû. Et i voet ariver l’ atelêye, et i comince a s’ fote do Diåle. Waite mi-n ome ! Vatchî ! Cwè çk’ il a la po ene atelêye-godén ![1] Tot kihosse et n’ a rén ki tént. Et s’ fote ; et les vårlets rire.
Et les vårlets, tot d’ on côp : « Fjhoz todi atincion, mwaisse, paski vos n’ savoz nén a kî çki vos avoz a fé. C’ est l’ Diåle da Canva d’ Tourene. « A ! Dji m’ fote di ça, et… et… c’ est on menapyin ! Mi dji n’ conoxhe k’ on cinsî ; dji n’ conoxhe nol diåle e l’ comene.
Tot d’ on côp – i fjheut tchôd, gn aveut do solea – l’ aiwe comince a monter dins l’ coû. Et des murayes, ça rdjete di l’ aiwe a tot sketer. Et ça monte et ça monte et ça monte, k’ il atrapèt d’ l’ aiwe disca leu golé, presse a esse neyîs. Et c’ est ene grosse cinse.
Et li Diåle aveut continouwé s’ voye, et il esteut di l’ ôte costé del cinse, al poite. Et l’ cinsî, abeye a criyî : « Diåle ! Diåle ! Fwai ene sacwè ! On s’ va neyî.
How ! dit-st i l’ Diåle. Il aresse si tchår. I n’ a nén waitî. Il a rlevé s’ pupe. Et « hû ! » dit-st i. On ravance. Et l’ aiwe a comincî a dischinde.
Et dispoy adon, li gros cinsî dal cinse Umal, tchaeke côp k’ i passéve, et k’ i veyeut… et k’ i rescontréve li Diåle – on rtiréve si caskete pol mwaisse, a les gros cinsîs – c’ esteut l’ gros cinsî li tiréve si tchapea.
Télmint k’ il aveut stî seré ! Come po tchire !
Filmé li 27 di djun 2020 pa Lucyin Mahin avou l’ aidance da Jacques Desmet.
Pî-note