Voyaedjes / Djeyolodjeye
Manfred Lejoly, c’ est on waloneu d’ Ovîfa. Il a scrît on motlî ideyolodjike so ç’ pårler la, rexhou e 2001. Mins c’ est eto on clapant guide po l’ ci ki vout discovri l’ Efel. On payis al forire del Walonreye, et portant si måcnoxhou.
Li rapoirtaedje di ç’ voyaedje la est metou e videyo so « Vo Buze » (Youtube). Vola l’ tecse do responda, sins l’ son et sins l’ imådje. C’ est ddja mî k’ rén.
Dimandeu (Dm.) — Dj’ avans cial Manfred et dj’ estans e=n Almagne. Cwè çki vs dijhoz so les tienes, la, ki dji voe ?
Manfred Lejoly (M.L.) — Bén vola : ns estans e l’ Efel, el pårteye k’ on lome l’ Efel ås volcans. Tos les tiers k’ on voet la åtoû d’ nozôtes, c’ est des vîs volcans. I n a des foû vîs ki ont puzieur miyons d’ anêyes. Et i n a des ôtes, beacôp pus djonnes, ki ont télfeye… céncwante meye ans ou ene sacwè insi, et minme co pus djonnes.
Dm. — On a passé so ene plaece k’ esteut del castinne.
M.L. — E l’ Efel, i gn a puzieurès plaeces ki c’ est del tchåsse.
Dm. — Des djneuves [genévrier] k’ on a veyou ?
M.L. — Ns avans veyou des djneuves, et asteure on voet les volcans. Et çoula est on pô kimaxhî onk divins l’ ôte, hin. I n a des volcans k’ ont trawé houte del castinne.
Dm. — C' est do bazale ?
M.L. — On l’ sierveut po les pavés pask’ i dmanént tofer rexhes. Et c’ esteut advantaedjeus po les tchvås ferés : i n’ ridént nén voltî ladsu.
Dm. — E a vost avis, ça n’ vént nén direk do volcan ?
M.L. — Ça vént… siya, ça vént do volcan ! Mns ça n’ vout nén dire k’ il a djusse toumé e cisse plaece la. N’ rovians nén k’ i n a avou tote ene industreye, hin, ki a on pô candjî l’ payizaedje.
Dm. — L’ industreye des pires ?
M.L. — L’ industreye des pires ! Dvins les volcans, on-z espwete les bazales, on-z espwete les laves ki fjhèt… on direut des ptits critchons, ki siervèt po saiwer [drainer]. K’ siervèt po semer ossu sol moite glaece, so l’ ivier. Adon, i n a co l’ trachite, i n a l’ pire ponce ; i n a tote ene rîlêye di diferinnès pires ki plèt siervi, et k’ ont stî espwetêyes dispoy li tins des Romins. Motoit dedja divant ; motoit ddja dvant l’ Gåle. (…)
M.L. — Vola : nos nos trovans vola [ici] on pôreut dire el fouwire d’ èn ancyin volcan, ki aveut ataké i n a pus d’ cint miyons d’ anêyes di vola, et k’ a rebrocté foû puzieur côps å corant… nén des siekes… mins des miyons d’ anêyes. Et on s’ end aveut siervou come pirire po saetchî l’ bazale. Et asteure li pirire est abandnêye et la çou k' i ndè dmeure.
Dm. — Ça a brotchî foû deus côps ?
M.L. — Pol moens deus côps.
Dm. — La foirt foirt lontins et la disk’ a ût meye ans, ki vos djhîz, li dierinne.
M.L. — Nén ci-vola [celui-ci], k’ est unicmint terciaire : unicmint inte trinte et çk’ on=z a marké, la : deus troes miyons d’ anêyes.
Dm. — Çki vos djhîz enawaire… çou-cial divant nozôtes, c’ est a cåze di l’ Afrike ?
M.L. — Si on vout… c’ est cweri d’ lon ! Les plakes tectonikes, ki sont di grande pårteye del crosse del Tere : l’ Afrike a bouté viè l’ Nôr, conte l’ Urope, et çoula, ça s’ a rsintou pus lon disca vola. Et c’ est çoula k’ a enondé li volcanisse.
Dm. — Dabôrd, cial, Manfred nos avans, ådzeu, on volcan come on nd a veyou enawaire ; et pu ådzo, c’ est on trô. Comint çki ça va ddja ?
M.L. — Ça s’ lome on « maare » dins l’ payis. C’ est l’ veur, ådzeu, la, on voet ene copete : c’ est on volcan k’ aveut co l’ foice di basti ene montaegne. Et après côp — et c’ est assez noû : ça date di ût ou dijh meye ans divant Djezus-Cri, d’ on pont d’ vuwe djeyolodjike, c’ est vraiymint tot noû — des volcans k’ avént moens d’ foice n’ ont pus rén basti. Et après côp, il ont toumé eshonne et ça fwait des trôs come ci trô k’ on voet vola dvant nozôtes.
Dm. — Et k’ on lome sincieuzmint on « maare ».
M.L. — Awè ! c’ est on mot ki vént do plat almand, mins asteure ki les djeyologues e monde etir siervèt po discrire l’ afwaire.
Dm. — Paski c’ est l’ Efel k’ a stî studyî dins les prumîs come terén volcanike ?
M.L. — Åy ! Bén l’ fenominne des « maares » a stî e tos les cas situdyî, po-z ataker, vola. End a metans ôte pårt ; dji pinse k’ end a e l’ Ovegne, par egzimpe.
Dm. — Et ça, c’ est on « maare » k’ i gn a rieu d’ l’ aiwe didins, dabôrd ?
M.L. — C’ est onk des troes « maares » ki sont toprès del veye di Daun. Et come vos voeyoz, sol boird do « maare », gn a ene pitite tchapele. C’ est tot çou ki dmeure d’ on viyaedje, Weinfeldt, ki a disparexhou fén del Moyinådje, å sazinme sieke, après l’ pesse.
Dm. — Et cial, on voet li dessin di comint çk’ on « maare » s’ askepeye. Pôrîz espliker… respliker co on côp ?
M.L. — Co ene feye, come dj’ aveu dit enawaire, c’ est on volcan ki n’ a pus l’ foice do fote trop del martchandijhe e=n amont po fé on tier. Et cwand l’ tcholeur vént a hôteur di l’ aiwe k’ est dzo tere, çoula fwait ene esplôzion d’ wapeur, et après côp, tot rtoume eshonne. Et c’ est çoula ki dene ci bassén… cisse fosse la.
Dm. — Cwè çki vos avoz la dins vosse mwin, Manfred ?
M.L. — Ça, c’ est des cindes volcanikes ki vnèt d’ ene pirire la-djondant. N a puzieurès cårires vaici e l’ Efel. Ça fwait des dijhinnes d’ anêyes k’ on ndè sieve. On sieve çoula po drinner åtoû d’ on manaedje. On sieve çoula po drinner des novelès voyes. Et on l’ sieve po semer e l’ ivier conte li moite glaece.
Dm. — Ça sieve a saiwer les voyes ?
M.L. — Åy, a fé ene coûtche di drinnaedje dizo.
Dm. — Ebén merci bråmint des côps, Manfred.
Ramexhné pa Lucyin Mahin, e moes d’ måss 2012