Fåves do vî vî tins
I gn a d’ ça des ans et des razans, li bierdjî del comene, c’ esteut ene sakî ! Tos les djoûs, a l’ pikete, on l’ etindeut coirner po ramonçler, avou s’ tchén, les gadlots åtoû di s’ baston.
C’ est a lu k’ tot l’ viyaedje dinéve ses bedots po k’ i s’ våynuxhe ripaxhe e campagne : so les teres des pôves, so les djouxhires (teres k’ on lait cori a royes po les recråxhî), dins les schavêyes po rnetyî les bouxhons, so les stindêyes k’ avént rpåtler après l’ awousse, disk’ a dins les bwès k’ estént rischurés di çk’ i n aveut a magnî.
Nosse bierdjî, c’ esteut on vraiy såvadje. I n’ cåzéve waire. Tot seu, tote li djournêye avou des bedots, ça vos foirdjeye on caractere di sot, come on baston d’ schite, k’ on n’ sait pus pawou l’ prinde. On djheut minme k’ il esteut ene miete sôrcî so les boirds. Il esteut mårivnant, a n’ s’ è nén fé ene idêye, avou tot çki rshonnéve did près come did lon a ene djin. D’ astcheyance, ça lyi aléve coster ene fameuse furdinne !
On esteut ni lon erî del fén do moes d’ djulete. Les pîces estént dedja vudeyes di leus dinrêyes. I fjheut tchôd a cure schågnes et cayôs.
Djezus et Sint Pire, ki voeynut tant voltî nosse pitit viyaedje, s’ avént dit : « Tén, nos iréns bén disk’ a Gobtindje, po l’ fiesse di nosse sinte Mareye-Madlinne. »
I rotént tos les deus, souwant a gotes. Sint Pire bukéve so tos les cayôs, del poûssire aclapêye a ses lepes : « Ene voye come on n’ è voet pus, minme dins vosse payis, Signeur ! » Si Djezus n’ åreut nén yeu stî la, dji wadje ki les « ferdom ! » et les « nodidjale ! » årént potchî a l’ axhlêye foû del boke di nosse sint.
Nåjhi d’ etinde l’ ôte braire et s’ disbåtchî, Djezus l’ a revoyî å paradis. Bén binåjhe, Sint Pire, ki n’ aveut rén a xhufler del fiesse a Gobtindje.
Et vola Djezus mierseu so l’ schavêye. Il est nåjhi. I n’ sint pus ses djambes. Il a fwin. Et padzeu tot, il a ene boutche come on crahea.
Come i djond l’ campagne inte Djé et Gobtindje, i tchait buk a buk avou on vî ome ki rawaite a ses bedots : c’ esteut l’ bierdjî del comene.
Co on bribeu, moud-t i l’ ôte dins ses dints. Seur co onk ki tape l’ ovraedje a rén, et ki s’ pormoenne d’ ene tchapele a l’ ôte après ene crosse di pwin. Onk k’ a del moite tchå dizo ses bresses.
Djezus vént adlé lu, lyi dit bondjoû et stinde si bidon : « Vos n’ årîz nén ene miete d’ aiwe po onk ki fwait l’ voye di sinte Mareye-Madlinne ? » Sins minme rilever ses ouys so l’ ci ki lyi cåze, li bierdjî lyi raetche on mokion cåzu so l’ ponte di ses shabots et : « Ti n’ as k’ a dmorer a t’ måjhone, nawe, pouri tchén k’ t’ ès ! Mi aiwe, c’ est por mi et po mes bedots. Passe ti voye ! »
« Dji dirè ene påter por vos a Sinte Mareye-Madlinne ! »
« Bénwaite. Ça sereut co l’ sint Tibåd, l’ sint Medåd, l’ sint Pixhåd ou l’ sint Tchiyåd, et co tos ls ôtes, por mi, c’ est broke di viole. Tertos des diales tot raetchîs. Pete evoye radmint, oubén ti vas awè a fé a m’ bordon ! »
Trankile come Batisse, Djezus n’ respond rén. Bén seur ki l’ vicåreye doet esse deure dins les campagnes. Mins disk’ adon, sondje-t i, on n’ lyi a djamåy seré l’ ouxh, ni lyi rfuzer ene gote d’ aiwe. Comint est i possibe d’ etassî ostant d’ eguegnes dins s’ capotene. Tot doûs, Djezus s’ ashîd astok a l’ må-elevé. Assoti do vey l’ ome ossu påjhire, li bierdjî s’ astampe, rodje come on cok. Ça n’ est pus dvizer k’ i fwait, c’ est boerler. Ses ouys lyi bolnut foû di s’ tiesse, a s’ fé pus laid k’ i n’ est : « Mins pa tos les diåles, mi vass leyî trankile !? Passe ti voye, mannet bok ! Ttaleure, dji m’ va fé on måleur ! »
Djezus s’ rastampe, rote ene dijhinne di metes erî, s’ astådje, si rtoûne, tot påjhire po rawaitî l’ bierdjî peneuzmint. L’ ôte, ki n’ ratindeut k’ on capougnaedje po passer ses niers, monte a smince, on sope-å-laecea ! I s’ abaxhe, ramasse on gros cayô et l’ lancî après l’ tiesse do tchminåd. Ci-ci creye di må come on pierdou.
Tot dvént noer so on nuk di fistou. C’ est l’ tonwere ki respond, ki s’ enonde disk’ a Gobtindje. C’ est l’ aloumoere ki sclate dissu l’ viyaedje. Et après... pus rén... pus nén on brut... come s’ il åreut yeu on moirt so tote li stindêye. Pupont d’ bierdjî, pupont d’ bedots, pus rén k’ des blankès pires, groumeyes avou les teres : les resses do bierdjî et d’ ses bedots.
C’ est di ç’ djoû la, k’ les Gobtindjîs on dvou taeyî leus pires, pask’ i gn a onk did zels ki n’ a nén volou pårtaedjî s’-t aiwe !