On côp d’ ouy so l’ agricoûteure å sieke passé, e l’ Årdene
Les prumirès usteyes k’ ont egzisté po-z etertini les pasteures, ç’ a stî l’ fotche et l’ schoupe di flates. Li prumire, po les stårer et l’ deujhinme, po poirter å mitan d’ l’ eclôs les flates k’ estént padrî les håyes. Vos avîz, avou, li få po côper les tchedrons, les kixhådes [orties], les pådronnes [rumex], et pus rålmint des fetchires. Et on fiermint po côper les djniesses. Po rlever les bîs, on s’ sierveut del cougnêye di pré et del fotche.
Atoû des anêyes 1925-1930, li construjheu Labeye a Foret-dlé-Tchôfontinne, a fabriké ene pitite disbouzeuse al mwin, ki ståréve ene flate a côp. Mes cisse machene la rotéve a l’ ôle di bresses. D’ ocåzion, ele aveut costé 100 francs e 1936. Mi fré Roger et mi, dj’ end avans ståré, des flates, avou ciste afwaire la ! On fjheut des trinnêyes di 20 a 30 metes, e-z alant d’ ene a l’ ôte, et on-z inméve tant !
Tos les cis k’ estént atelés, avént on houyoe [épandeur rudimentaire] po hertchî les pasteures, po stårer les flates et les formoujhes. Li houyoe esteut fwait, soye-t i d’ èn ecådrumint di gros bwès scwårés ou di troes ou cénk bindaedjes di rowes atelés inte zels : deus dvant et onk padrî, ou bén troes dvant et deus padrî.