Kilomète après kilomète, li vôye si stind au d’ truviè dès bruwêres. A gôche, a drwète, padvant, padrî rin ki l’ bruwêre. On comince a ‘nn’ awè s’ sô, dizo l’ pleuve ki s’ a mètu a tchêr, sèréye, frède, tchèssîye a pakets pa on lêd vint d’ iviêr ki rin n’ arète sul grande plin.ne. Come one sauvadje bièsse, i s’ ènonde di d’ lon an hûlant, po s’ daurer sur nos come s’ i nos vleûve rivièsser, nos staurer d’ avance dins l’ sauvlon, dèdja dvant k’ nosse fosse n’ î fuche prèsse.
On-z è-st-èvôye, cate par cate, galiârds come cand on paurteûve a l’ egzêrcice, lès pus vayants chuflant a toûr li mârche do trêzyinme ou l’ cène dès calonîs. Mins asteûre?
Pus pèrson.ne ni mouvtéye. Lès orèyes chîlnut a fwace ki lès stomaks sont vûdes èt k’ on-z èst naujis. Tènawète, i gn a onk ki blonce su sès djambes, on brouliârd divant lès oûys. Rastinu èt rmètu d’ aplomb pa sès vwèzins, i continûwe come one vîye aridèle, tant k’ ça îrè.
L’ oficier a tchvau trote d’ on coron a l’ ôte dèl minâbe porcèssion.
– Los, los!
Lès omes n’ è polnut pus.
– Schnell, schnell!
Li file divint todi pus longue, fêt a fêt k’ lès pîs son.n’nut pus fwârt dins dès solés sins smèles, dins dès gros pèzants sabots.
– Gehe zu! Gehe zu! Faule Tiere! Èt i tchèsse lès pus taurdus an leû fiant sinte li dbout di s’ cravache.
– Po le stronner, cètila, je r’trouvrais co bin dèl fwace dans m’ pougn, grûle Hinkens[1].
– Tonwâre di D… tot ç’ k’ i faut vôy èt n’ wazu boudjî!
Sul cavalcâde ki freûve brêre lès rwêtants, li pleuve wîde todi. on ptit boket d’ cur. Lès bias mascarâdes ki nn’ èstans! Dès djnos pasnut au d’ truviè d’ vîs pantalons d’ twèle k’ on gobieû n’ vôreûve nin; dès Anglès è purète (il ont vindu jusk’ a leû vèsse por on tchantia[2]), li tchmîje disfligotéye plakéye sul dos, trèssin’nut d’ frèd, li tièsse rintréye dins lès spales. Dès cias n’ ont rin su leû cabu po s’ garanti, dès ôtes n’ ont k’ one twèle di shako, one bazane[3] di bonèt d’ calonî.
Lauvau, li ciél tchèrdjî d’ grossès nwârès nûléyes a l’ êr di rdjonde li bruwêre. I ploût a rlaye, li vint hûle a mwârt.
(…)
On toûrnant, one grande câréye cinse, avou on rodje twèt ki dischind cauzu jusk’ al têre. One maujone! Ça fêt combin k’ nos ‘nn’ avans pupont vèyu? Come i freûve bon intrer la, s’ achîde o culot po s’ sètchi, pwis s’ atauvler dvant one platnéye di salade èt on vêre di bîre, come nos aurin.n’ plu fé dvant, cand nos èstin.n’ co dès djins.
Tote li pèkéye acourt po nos wêtî passer; one diméye dozin.ne di gamins d’ totes lès grandeûs, avou l’ pania ki passe, foû d’ culotes ossi trawéyes ki rapîçtéyes, èt trwès ptitès bauchèles avou dès tchvias come dès bouchons di spènes. Tos lès noûv ont dsu leû tièsse li gris bonèt a bwârd rodje avou one pitite crwès padvant, li minme ki les assazins d’ Tamène[4], Dinant[5] èt alieûr!
Bin i polnut yèsse fiérs dèl mète.
(…)
Anfin, on taudje. Au bwârd dèl route, dins l’ bruwêre fine frèche, li colone s’ aflache, cauzu tote d’ one pîce.
(…)
– Antreten, los! Antreten.
Dèdja an rangs? Bon Diu k’ c’ èst deur di s’ rimète an route.
Li pôve Tarriaux èst télmint afwèbli, sès pîs sont si bin abumés k’ i n’ si sét tnu astampé.
– Los, los!
I trèbuke, èt s’ vwèzin nèl sét ratnu. Ah, l’ calvêre!
Tant pîre, on n’ a nin l’ tins d’ ratinde. One santinèle dimeurrè dé li jusk’ a tant k’ i faurè. Èt l’ cavalcâde divneuwe moyale si disrôle au ddilong dèl route. Tènawète one tièsse si distoûne. Tarriaux èst todi la stindu, avou l’ Alboche dé li ki saye dèl fé s’ astamper an l’ êdant avou l’ crosse di s’ fuzik.
Nos n’ l’ avans jamês rvèyu.
Metou sol waibe « amon Lorint » li 30 di djun 2024. Les notes ciddé padzo sont scrîtes på waiburlin.
Tecse lî et cominté pa Lorint Hendschel : vaici}}