Les biesses acsûtes del pesse

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Mwaisse modêye da Duvivier de StreelFeller-PironFeller-Piron-Mahin.
Jean de Lafontaine
Les biesses acsûtes del pesse
« Les Animaux malades de la peste »
rortografiaedje da Lucien Mahin e rfondou walon, sol modêye da Maurice Piron (La Vie Wallonne, 1948)
2020
Les biesses acsûtes del pesse

On må ki fjheut setchi d’ oreur,
On må ki l’ Diåle, li pus grand et l’ pus noer,
E fond d’ l’ infier a-st edvinté ;
On må k’ on tronne rén k’ d’ î pinser,
Mågré sint Rok et sinte Djenvire ;
On må k’ on n’ endè doet måy rire
Di sogne di l’ atraper
Si l’ cloke di Rome vineut-st a souner ;
Li Pesse, infén, li pus grand d’ tos les mås
On bea djoû s’ vora so les biesses.
Lumçon, halene, foyon, sori, rat et cwate-peces
Ågne et chamo, boû, vatche et tchvå,
Oûsse, mårticot, tchén, leu et rnåd
Morént tertos come des moxhes.
Pus nou råskignoû so ene coxhe
po tchanter hiyouhi yaritchitchi tchitchi,
pus nou pénson po s’ bate a s’ fé cwincsî,
pus nou diåle di moxhon voleu
po fé assoti l’ payizan ;
les poes sourdént a l’ advinant
et les frumints prometént boune aweure
sins k’ on-z avaxhe, ciste anêye la,
mezåjhe di poure ni di spawta.
Les pôvès biesses longues sitindowes
ratindént leu dierin moumint
sins rmouwer tiesse, orayes, djambes, pates ni cowe.
Foirt pô fijhît leu testamint :
nouk n’ aveut d’ keure di s’ feme ni d’ ses parints,
End aveut i d’ keure vormint !
On n’ a waire di keure ki d’ lu-minme,
cwand c’ est k’ on voet ki l’ Moirt rishinme
Li grand coutea ki barloke so ses rins.
Dvins on sfwait doû, dvins ene sifwaite doleur,
Monsieu l’ Liyon k’ esteut l’ Mayeur
et l’ grand Privot eyet l’ sovrin Signeur
di totes les biesses å lådje å lon,
pitites et grandes (et minme, dit-st on,
k’ åreut co polou l’ esse
di beacôp d’ ôtès biesses
ki s’ tinèt foites d’ awè l’ råjhon
po çou k’ elle ont ene pitite tiesse
al copete di deus longuès schaesses
k’ ele catchèt dzo on pantalon),
Monsieu l’ Liyon tot-z efouwé
broke foû di s’ trô come on dåné !
Evoye li Rnåd di tos costés
po houkî — abeye abeye ! —
tot ç’ monde di biesses å grand Consey :
advocåts, escabins,
scrijheus, pårlîs, redjints
et tos les ôtes ki n’ estént rén,
po dliberer et po lyi dire
dou çk’ i vneut ki l’ grand Mwaisse do cir
s’ aveut côrcyî d’ ene téle manire
so totes ses pôvès biesses di djins.
Cwand les ourit totes rashonné :
« Tchers camaerådes, lezî dit-st i,
c’ est ene pôve atelêye
ki d’ awè l’ pesse divins s’ payis.
Si çoula n’ va nén vite fini,
nos dhotrans tos dvant les djalêyes…
Fåt k’ ns åyanxhe fwait kéke ewaeré petchî
ou k’ nosse raece soeye emacralêye
Fjhans don come e tins d’ Djubilé,
fjhans nosse kifession djeneråle
et s’ dijhans tot sins pus bourder
k’ èn aprindisse ou on corå.
Adon l’ ci ki s’ trouvrè
li pus rogneus, po tot l’ houdin payrè.
Li Pesse, veyant ki d’ lu-minme on s’ amete,
Dvalrè-st evoye ; nos lyi brairans : schovlete  !
Dijhans don tot, minme nos pus gros lapåds,
sins djouwer al rispounete,
fouxhénxhe-t i come des tiesses di tchvå.
Mi, dj’ a léjhou dvins m’ live di messe
ki c’ est l’ pus fameus des moyéns
po acondjurer l’ pesse,
et ki Djônasse, k’ esteut on vî crustin,
po on sfwait cas, divins on tins d’ timpesse,
fourit tapé e fond d’ Mouze come on tchén.
Mi, come mayeur et borguimwaisse,
dji vs doe l’ egzimpe, dji va cmincî,
ca cwè çki vos dirîz
si, mi, k’ est vosse signeur, vosse mwaisse,
dji vicreu come on ptit tata,
n’ alant måy a vepes ni a messe
sogne ki l’ eglijhe ni m’ tome so l’ tiesse ?
Si dji freu come çoula,
 vs årîz l’ droet di m’ codåner,
sins m’ diner l’ tins di m’ kifesser.
Mins, gråce a Diè et sins m’ vanter,
dji vike come on m’ a-st aclevé :
dji sohaite ki tos les borguimwaisses
endè polexhe dire ostant sins bourder.
Dji vs dirè don, sins fé l’ beguene,
ki, d’ tinzintins, dj’ a ene måle alene
et ki, cwand dj’ vou mel fé passer,
i m’ fåt on boket d’ tchå bén frisse et nén salé.
Målureuzmint, dj’ m’ a disgosté
di n’ magnî måy ki des fenès lipetes ;
les berbis et les berbijhetes
mi fjhént on bén, dj’ el doe bén avouwer,
ki, cwand eshonne dj’ endè veyeu-st ene hiede,
dji dåréve su come on possédé.
Mins, çou ki m’ poenne disk’ å fond d’ mes tripetes,
c’ est ki pus d’ ene feye dj’ a magnî,
po l’ rawete,
li bierdjî…
L’ cour mi pårtixh e deus cwand dj’ î pinse,
Mins dj’ end a ene téle ripintince
ki dji vou-st araedjî
si dji n’ merite nén les fonds d’ fosse et l’ potince…
Codånez m’ don
sins remission,
Dji n’ vou ni pardon, ni escuze !
Dji dmande seulmint (çou k’ est bén djusse)
ki, dvant do mori, dj’ poye schoûter
çou k’ ont fwait tos les ôtes,
ca, cial, i gn a kékes bons apôtes
ki n’ ont nén trop a s’ vanter :
dj’ vôreu oyî kimint i s’ vont schovter,
ni fouxhe çu ki pa curieusté. »
— « Signeur, lyi dit li Rnåd, tot loucant a coirnete,
kitoirdant s’ gueuye, hossant s’ hanete
et rboutant diski dvintrinnmint
on sot riya ki lyi vént so ses dints :
« Signeur, dit-st i, å vraiy, dj’ a ene honte
di vs oyî nos fé des sfwaits contes.
I m’ shonne,
cwand dji vs etind,
oyî pårler èn enocin,
enocin come l’ efant ki vént-st å monde !
K’ avoz vs, pardiene ! fwait la k’ vos n’ divîz fé !
N’ fåt i nén magnî po viker ?
Et vos, k’ est on si grand signeur,
iroz vs magnî
do pan tot noer
come on savtî ?
Fijhèt i ôtrumint, çou k’ nos lomans les omes ?
S’ contintèt i di cûtès pemes,
cwand i polèt awè ôte tchoi ?
N’ les voet on nén, minme les Lidjwès,
zels k’ avént tant d’ haeyeme so l’ glotinreye,
cori, lancî après les bounès betcheyes ?
Awè, dai ! ci n’ est pus come do vî tins passé
ki pere et mere shonnént todi tronner
et k’ c’ esteut todi ene tchitchreye
di sogne ki les efants pus tård n’ irént briber.
Ouy, on n’ fwait pus des sfwaitès boubierreyes :
s’ on-z a greté, les efants dvèt greter ;
et sins tant d’ kidjåzreyes,
çou k’ on wangne, çou k’ on-z a
c’ est tot po l’ åté do gozî.
Et c’ est eco, permetoz k’ dji vs el deye,
di vosse pårt ene ôte loignreye
di dire k’ i vs atouma kécfeye
do magnî
on bierdjî :
c’ est k’ vos n’ savoz ni l’ zisse ni l’ zesse.
Ca, d’ nosse tins, sorlon l’ môde inglesse,
les djins n’ sont rén d’ pus ki les biesses.
Sondjîz k’ c’ est l’ tins del liberté,
ki biesses et djins, omes et femes sont ewås,
on n’ voet pus ni vantijhe, ni firté feyodåle.
On grand va ouy si pormoenner
avou si coibjhî a s’ costé ;
on ritchåd, on bankî, on borguimwaisse di veye
n’ ont nén pus d’ glwere k’ on ptit scrinî.
C’ est co bén mî : po esse pus djusses,
les grands, les ritches, dit-st on, si vont rmete å noer pan ;
on payrè tos eshonne les cinses et les cårlusse,
sins ki nouk åye èn aidant d’ pus.
Kéne fiesse ci serè : pus di ptits et tos grands !
Insi, ki ç’ soeye ene ågne, on bierdjî ou on roy
ki vs åye passé pa les boyeas,
c’ est po leu conte, n’ alez nén fé fafoye :
vs avîz fwin, vs avoz bén fwait ».

Insi plaita li Rnåd et totes les ôtès biesses
batît des mwins, breyît « Vivå ! » ;
ele fijhént on brut, on harlahå
å fé toumer l’ cir so leu tiesse.

Adon vna tour del kifession
des signeurs et des crås cous-d’-tchåsses
k’ avît tos å pus noer tchôdron ;
mins l’ trô djamåy ni ratindeut l’ eplåsse.
Come po l’ Liyon, nosse mwaisse Rinåd
esteut la po fé l’ advocåt
po l’ tigue, li leu, l’ chamo et l’ oûsse.
Les biesses cagnesses et les moens doûces,
totes, disk’ å tchén d’ cinse et d’ mangon,
el fijhît djåzer tot come on Ciceron.
Todi il aveut el boke
l’ egzimpe des omes, po mete å stok
les racuzetes ki vnént
amete on grand d’ on grand petchî.
S’ on nd acsinsive onk d’ ene touwreye,
i djheut bénrade po l’ ricovri
k’ les omes fijhént bén moens di cas del veye,
ki zels si rcwerént et s’ batént a moirt po ene tchitcheye
mågré les lwès k’ el disfindént.
S’ on traitive l’ ôte di liere, filou, voleu,
po çou k’ i s’ aveut acwerou ene aweure
tot prustant a céncwante å moes
et metou ses vijhéns å l’ ouxh sins feu ni leu
ou k’ aveut fwait troes ou cwate feyes bancrote,
metant l’ gômåd a pont et n’ leyant k’ les clicotes,
Mwaisse Rinåd n’ mankéve nén d’ plaitî
k’ les omes djamåy ni pûnixhént,
ni del potince, ni del harbote,
les djins fûtés k’ savént
acsegnî a s’ taire å papî,
k’ on cnoxheut des grandès cpagneyes
k’ avént rwiné des pôves ovrîs
sins k’ on trovaxhe a les picî ;
ossu k’ faleut-st esse biesse come ene cougneye
po n’ nén djudjî k’ des omes insi
avént bén acwerou leus wangnes,
fijhant mosse et prouve di tant d’ esprit.
C’ est insi ki li Rnåd, brozdant avou ses frågnes
les pus laids côps des grands bandiys,
fijheut d’ tos zels des sints do Paradis.

Al fén, vocial vini ene pôve ågne,
ene vraiye bourike avou ene viye pea
k’ on lyi veyeut tos ses oxheas.
Ele s’ avancixh tote tronnante :
« Camaerådes, pusk’ i fåt, i fåt »,
Dit-st ele, « dji so bén vosse siervante,
mins dj’ a so m’ cour on gros macåd.
Dji sieve on pôve vî payizan
k’ est bén sovint malåde,
ki n’ vike ki d’ cariståde
et n’ magne sovint k’ des crosses di pan.
Mi, dj’ so rpaxhowe a l’ advinant,
di façon ki l’ tîce di l’ anêye,
vraiy, dj’ assotixh di fwin.
Mins pusk’ i l’ fåt dire, i m’ sovént
k’ on djoû ki dj’ esteu-st afameye,
m’ a-st arivé
(tant ki dj’ vicrè, dji nel roveyrè måy)
do passer
près d’ ene bele vete håye
do djårdén d’ on curé.
O ! dji m’ l’ a bén rprotchî !
Mins å stoumak, dj’ aveu ene téle crouweur
ki dji n’ m’ a polou passer
d’ endè linwter
ene tote pitite verdeur,
priyant tot bas li bon Diè et l’ curé
di mel voleur bén pardoner
po l’ grande necessité. »
I n’ aveut nén fini k’ il aveut dedja s’ hate.
« Kimint ! cabea, boigne gueus,
brigand, napea, tigneus !
c’ est don ti k’ fwait ki l’ pesse nos trûle, nos spate ?
Magnî l’ håye d’ on curé,
ene sinte, ene benoete håye,
sins respet po l’ Eglijhe et po li crustinnté
Et l’ magnî sins l’ dimander  !
E coir, i fåt ki t’ åyes
li noer diåle ki nos a epesté !
Fat k’ on t’ axhore et k’ on t’ kiråye
afén k’ nos soeyanxhe dilivrés. »
— Come on lyi djha, on fjha l’ djustice.

Ci djudjmint la ravize
a beacôp d’ djudjmints k’ nos fjhans.
On court po l’ ritche ; li pôve on l’ abandnêye ;
on pind les ptits voleus, on lait cori les grands.
S’ i gn aveut nou bon Diè, nos fréns ene fameuse corwêye !