Les bierdjîs

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Feller-LéonardMwaisse modêye.
Les bierdjîs
1981
Les bierdjîs

I.

Vo les la rarivés avou leus grands tchapeas.
Leus camizoles di linne, wai, shuvèt les tropeas,
Les bierdjîs.

Dolmint k' l' ivier est houte, abeye ås pasteraedjes;
Et cwand l' yebe est rossete, i rdischindèt å viyaedje,
Les bierdjîs.

Sol tins k' leus biesses bevèt, i s' ascropèt e rond
Ey onk apougne ene zûne so on xhuflet d' sizon,
Les bierdjîs.

II.

Les pus vîs savèt tant so totes sôres di cayets
Ki tote nute i contèt, et les djonnes djins schoûtèt
Les bierdjîs.

T' as l' Zande avou ses diåles et ses Pépés Crotchets,
Et ses noers leus-waerous, ki vs creyoz k' i vs hapèt,
Les bierdjîs.

Li Gusse, lu, c' est des fåves a s' kipixhî tot l' coir,
A disratchitchî l' front d' on mårlî so s' lét d' moirt,
Les bierdjîs.

III.

Et pu gn a des beas djonnes k' ont leus ouys si spitants
Ki les cmeres do viyaedje è rovièt leus galants,
Les bierdjîs.

Leus ouys les dismoussèt, ces ouys k' ele vôrént bén
Aveur divant leus ouys disk' a dmwin å matén,
Les bierdjîs.

Et vey did près leu boke eterêye dins leu båbe
Såf cwand gn è stritche on rire ki rdjibele so les åbes,
Les bierdjîs.

IV.

C' est k' i nos dizôrnèt; i n' sont nén come nozôtes;
On tuze a leu vicaedje, on croet esse di leu monde,
Ås bierdjîs.

Magne les minmès fadêyes, raweye li minme froumadje,
Et s' broye ene djaeye u deus po les mete e pårtaedje
Des bierdjîs.

Ashî tu dvant l' braijhisse po cure sacwants crompires,
Mins ç' n' est nén avou ça ki to drovrès l' bårire
Des bierdjîs.

V.

La les aireurs do djoû; deus troes berbis binlèt
Gn a l' berå ki pestele; les bedots djibotèt,
Les bierdjîs.

Adon, il ont ralé avou leus grands tchapeas
Leus camizoles di linne rishuvèt leus tropeas,
Les bierdjîs,

Viè des cråssès pasteures, so les tienes, ezès vås,
Avou des ôtes vijhéns k' elzès schoûtront låvå,
C' est la l' veye… des bierdjîs… des bierdjîs…

Note Wikissourd
Riprins d' ene pådje di l' Aberteke, ene miete ricandjeye.
Les fråzes ont dvou esse rarindjeyes po poleur mete li coron -ès ki manke tant dins l' mwaisse modêye askepieye dins on pårler ki n' ont nén cisse rîle di croejhete la.
Gn a eto ene rujhe avou li definixhant årtike femrin, «la», nén spotchåve dins l' mwaisse tecse, et «l(i)» e rfondou walon. Ça fwait: fåt rtrover on pî tot redjårbant ene miete li fråze.