Vo-lès-là rarivès
Avu leûs grands tchapês.
Leûs camisoles du lin.ne,
Wê, sîjèt lès tropês.
Dolmint qu’ l’ivyinr èst yute,
Abîe s’ lès pastèradjes.
C’èst quand l’iabe èst rossate
Qu’is rudchindèt o viadje.
Lès pus vîs savèt tant
So totes sôtes du cayèts
Quu tote nut′ is contèt,
Èt lès djon.nes djins choûtèt.
Tès l’ Zande avu sès diâles
Èt sès Pépés Crotchèts,
Èt sès nwârs leûps warous
Quu v’ creûyèz qu’is v’s-apèt.
Lu Gusse, li, c’èst dès flauwes
À s’ kupichè tot l’ cwârps,
À dusratchitchè l’ front
D’in maurlî so s’ lit d’ mwârt.
Èt pîs gn-è dès bês djon.nes
Qu’ont leûs-oûy si spitants
Quu lès coméres du viadje
È rovièt leûs galants ;
Dès-oûy qu’ lès dusmoussèt,
Dès-oûy qu’èles vôrint bin
Avèr duvant leûs-oûy
Jusqu’à d’mwin o matin.
Èt leû boutche ratèréye
Bauke du pa-d’zos leû baube
Po lê stritchè in rîre
Qui r’djibule so lès-aubes.
C’èst qu’is nos dus’zaurmièt ;
Is n’ sont nin come nos-ôtes ;
On tûze à leû vicadje,
On creût-z-èsse du leû monde ;
On mougne lès min.mes fadéyes,
On rawîe l’ min.me fromadje,
On broye ène djaye ou deûs
Po lès mète o partadje.
On s’assît d’vant l’ bréjis′
Po cûre sacantes crompîres ;
Mês c’ n’èst nin co d’ènut′
Qu’on droûverè la baurîre.
Là lès-êreûs du djoû !
Deûs treûs bèrbis bwâlèt ;
Gn-è l’ bèraud qui pèstule ;
Lès bèdots djibotèt.
Adon, il ont ralè
Avu leûs grands tchapês
— Leûs camisoles du lin.ne
Rusîjèt lès tropês
Quèri dès-crausses pastères
So d’s-ôtes tiènes, dins d’s-ôtes vaus,
A vu dès-ôtes vèjins
Qui lès choûteront lauvau.