Enn’a qui s’plaindet baicôp
Et qui s’lamintet jourmâye ;
Qui n’riet mâye on p’tit côp ;
Qui n’si d’vèrtihet jamâye.
On l’s’y plaq’reut minme dè l’crâhe so leus pîds,
Di l’ôle so l’narène et dè l’crâhe â drî,
Qu’is s’plaindrît co pus et v’qwîrît misére
Tot d’hant qu’vos sayîz dè l’s’è mette è térre !
Tra la la la la, tra la la la la !
Mi ji sos todis joyeux comme çoula !
Tra la la la la, tra la la la la !
C’est mi qu’est Colas, l’awoureux Colas !
Ossu, di m’sôrt ji m’plais bin ;
Ji n’a d’keure des mâlès lawes ;
Quoè qu’ji n’a ni censes ni bin,
Li misére ni m’fais nin pawe.
Comme j’a des bons bresses, on pau d’liberté,
Ji passe mi p’tite vèye à rîre et chanter.
Li gloriole des autes jamâye ni m’tèm’têye,
Tant qu’j’a l’coûr binâhe, ine crosse mi gostêye !
Mi bonheur n’a nin dangî
Des gây’lotèges di l’èvèye.
Ji n’donreus nin n’bonne prangî
Po les vanités dè l’vèye !
Ji haussihe les spales so l’marchî d’l’amour ;
Ci n’est qu’po les censes hoûye qu’on donne si coûr
Po fer des grandeurs, on s’rimplihe di dettes.
Min, mi, l’joyeusté di mi-âme, c’est l’toèlette.
Li mitant di m’contint’mint,
C’est l’mitant d’tote ine richesse.
Si j’tûséve â lèd’dimain,
J’âreus n’neûre îdèye èl tiesse.
Ji magne çou qu’ji trouve sins rin geairî d’pus,
Ca ji n’a bin wâde di m’casser l’cabu ;
On est trop vite moért et, sins gâylotège,
C’est là qu’onk comme l’aute on n’a qu’ine ostège !