XII
Li « Psi »
Marîye-Aurore di Sint Mâtin boute dispôy quatre ans come « psi » dins on burau d’ médecéns novèlemint ayincî, dans on novia vij’nauve qu’on l’ lome « Chicago » al sôrtîye di Djiblou.
Quén bia nom à ralonje, mins dji n’è frè wêre di cas véci : vos m’aloz co dîre qui dji m’ siè d’ ça po rimplu mès pâjes. Po nosse pasquéye, djè l’ lomerè : Maurdi.
Trinte quatre ans, èlle aveût tot rèyussi dins s’ vicaîrîye. Po sès scoles. Po s’-t-ovradje èto, po l’ rèsse, èlle aveût co bin l’ timps. Ça n’ lî displaît nin do passer al tévé, ça amin.ne todi dès pratiques.
Li tévé èsteût todi à leûs côrdèles quand i-gn-aveut on maleûr qui tchaîyeûve èt l’zî rauyî dès quèsses èt dès mèsses à raconter à leûs r’waîtants. (l’audimat, qwè !)
Il avin’ bin tchwèsi l’ place po l’intèrviouwer. à l’intréye d’on grand botique. Canal Zoom, l’aveût volu insi, po mostrer totes lès djins qui fyîn’ leûs coûsses po l’ Noyé. (co l’audimat !)
Lès gazètîs lî apudenut qui l’ crapôde Dècrampes qu’on n’avoz pus vèyu dispôy li 19 à stî r’trovéye sitron.néye. Su quatre ans, i-gn-a d’dja yeû quate qu’ont disparètu : à Pèrwez, à Inguèzéye, à Sombrèfe, au parc dès fabriques aus-In.nes. Ça comince à fé branmint ! Li police ni motîye nin là d’ssus ; sèreût ç’ lî minme moudreû ?
Qwè ç’ qu’èle va rèsponde à ça ? Qwè ç’ qu’ èle pinse dèl moûdreû ?
Èle n’a nin stî è scole po ça, èle ni conèt qui ç’ qui l’ police a d’dja bin volu dîre. Li gazètî rataque tot lî d’mandant à qwè ç’ qu’on « psi » sondje dins cès cas là.
Èle si sint oblidjîye do rèsponde.
À s’ chonance li touweû n’èst nin on sot. I n’ laît pont trace, li police nè l’ sét atraper. Dins tos lès cas, i n’ si sét rasténre do fwârcî èt bouriater lès coméres. Mins quand il èst à s’-t-ovradje ça dwèt yèsse on’ ome come on’ ôte.
« Qwè ç’ qui pout fé qu’on’ ome divént come ça ? »
« On’ èfant tot seû qu’a stî bouriaté. »
« Tos lès-èfants bouriatés ni d’vègnenut nin dès touweûs. »
« I l’ divègnenut po rèpèter ç’ qu’il ont d’vu sopwârter. »
« I m’ chone qui v’s-avoz do l’ pitié po cès djins là ! »
« I n’ divègnenut nin tortos dès touweûs, mins on côp qu’i l’ont faît, i n’ savenut pus fé ôtrumint. »
« Vos acèrtinoz qu’i va co touwer ? » …
Èle si rind compte qu’èlle a tchaît dins l’ nasse. Qwè rèsponde à ça ? Lès djins vont awè peû, li touweû va yèsse binauje.
« Oyi, tant qu’i ou qu’èle ni sèrè nin au yo-yo ! Avoz sondjî qu’ ça pôreût co yèsse one feume ? »