L’ajent Mwasse/XIII

Èn årtike di Wikisource.
XIII. Lès-èlodjeûs

XIII
Lès-èlodjeûs

Fabiène Pèloso a r’çû Primo avou on visadje rissatchî di scrandichûre : dès potches come dès d’méyès pîces di deûs-eûros pa d’zo sès-ouys. Mwinre come èlle èsteût, moussîye come on fagot dins on vî djin’ à fligotes, avou on nwêr sipès tricot, ça l’ rindeûve co pus minâbe. Primo s’a d’mandé comint ç’ qu’one si bèle fleûr aveût tant p’lu candjî. Comint ç’ qu’èle p’leût sopwârter lès sauvadjes côps d’ rins d’on piqueû-maurtia qui pèseût s’ pwèd d’ satch.

« T’as one mwaîje tièsse, Fabiène ! »

« Vos n’ valoz nin mia… Vos-avoz on nwêr ouy… »

« Oyi, mins rén d’ grâve, dji n’a nin vèyu on’ uch qui trivièsseût m’ colidôr. »

I s’a achîd dins l’ vî fastrou au culot tot mostrant l’ pot d’ li stuve tchaufé à blanc.

« Vos v’ wasoz co sièrvu di s’ vîye riquète là. I m’ choneût qu’il aveût passé d’ môde. »

I s’a r’lèvé po fé l’ toû do monumint.

« Ô là là ! Avou one parèye bûse, vos n’avoz nin peû ! Vos n’ vos rindoz nin compte di totes lès djins qui morenut avou lès fumêres ? »

« Nosse man mè l’ dit à chaque côp qu’èle vént, ni r’drovoz nin co l’ plâye. Nosse tchôdêre a faît s’ dêrène bauye èt ç’ n’èst nin avou on tchaufadje à l’élèctrique qu’on s’ va sawè r’chandi come i faut. Tot ratindant, ça nos spaurgnerè di n’ nin èdjaler au Noyé. Silvin a r’bouchî lès crâyes avou do roufing, ça ténrè co bin po saquants djoûs. »

« Dji so-st-au r’pintant qu’ Silvin vos-auye causé d’ ça. » a-t-èle rataqué a bachète.

« Dji n’ so nin vosse soçon qu’ po lès bons momints. »

« I s’ fujenut todi pus râres. Dins trwès-eûres, c’èst l’ Noyé, èt dji n’ m’a nin co aprèsté po plaîre à m’-n-ome. »

« Rifaîtot, a passé po l’ tchôdêre ? »

« Oyi, i nos-a doné s’ dèvis. »

« Quand ç’ qu’i vénrè po l’ candjî ? »

« Dins trwès djoûs… »

«  Combin ? »

« Trop… Branmint d’ trop ! »

Silvin à moussî dins l’ salon, si baube nin faîte, on tricot co pus laîd qui l’ cia di s’ feume, lès lèpes findouwes.

« Yop ! Primo…, li p’tite dwat… »

« Sil, i sèreût timps di t’ moussî comufaut ! Cor one eûre èt l’ banque sèrè sèréye ! »

Fabiène a lwârgni s’-t-ome : «  I cause di d’ qwè là ? »

Silvin a ossî sès spales.

Primo à r’prins : « Dj’a cénq mile eûros su m’ livrèt di spaugne, vos m’ donoz l’ chife di ç’ qu’i vos faut, dji vos faît on chèque èt on n’è cause pus. »

Divant qu’ Fabiène n’auye li timps d’è placer one, i s’a r’lèvé di s’ fastrou èt lî mète on dwègt su sès lèpes.

« Taîjoz v’ Fabiène. Cès liârds là dwâmenut su m’ compte. I n’ sièvenut qu’à payî l’ pîce aus pourîs banquîs qu’ènnè fujenut ç’ qu’i volenut padrî nosse dos. Dj’ènn’a plin lès guètes di d’ner dèl jèléye à dès pourcias ! On nos fwace à spaurgnî, i nos dîjenut d’ prinde dès-acsions, èt on côp qu’èle sont su l’ mârtchî, èle ravalenut. Twè, ti n’as pus rén, èt zèls, padrî t’ dos, i lès-ont racheté por one crosse di pwin. Èt si dj’ vén à moru d’mwin, èle m’ârè sièrvu à qwè mi spaugne ? Carpe diem, come dijeût l’ôte ! Ci chèque là, vos l’aloz prinde ! »

Fabiène, riwaîteût s’-t-ome tote paf : « Di one saqwè, grand-èwaré, al place di choûter moya ! On n’ pout nin dîre oyi. »

Silvin tûzeut dins s’ tièsse. Dins l’ fond, c’èsteût on bon plan, on n’âreût nin dès dotes sur zèls : on n’èst nin oblidjî di scrèper lès fonds d’ ridant quand on-a deûs miyons d’eûros. Tot jusse ci qu’ lès flics si dîrin’ s’i r’montîn’ jusqu’aus biyèts.

« Vos m’ catchîz one saqwè, in, vos deûs ! Dji conè m’-y-ome come si dj’ l’âreû faît mi minme. Quand il a dès stwèles plin sès-ouys come ça, c’èst qu’il a one novèle à m’ dîre ! Tè l’ saveûs, in ! Lache li bokèt ! »

« Dj’ènn’aveû pont d’idéye, mi keûr, dji tè l’ djure ! »

I lî a d’né on bètch, tot lî d’djant : « Dji m’ va aprèster ! Po l’ momint nosse planète è-st-èmacraléye. I-gn-a qu’ lès sots po r’fuser dès caurs ! »

« T’as trové ça tot seû ? »

Li timps qu’ Silvin passeût à s’arindjî, Primo a tîjené Fabiène avou s’ babèye di tchafiaud po qu’èle si lèye à dîre.

Lès deûs-omes ont moussî foû avou leûs-ouys capons. Fabiène à v’lu toûrner l’ clé d’ l’uch divant d’ s’aler aprèster. Mins èle n’èsteût pus là. Portant, èlle èsteût sûre qui…

On-aleût passer l’ Noyé. Èle v’leût tot rovî, li timps d’ saquants-eûres, èt s’ fé bèle comme au prumî djoû.

Por on dêrène danse…

Po s’ tote dêrène danse…