Kî esteut ç’, ci ptit ome la k’ avancixheut, tuzåd, åd dilong do Danube ?
Ses påpires dimey cloyowes muchiént ene grijhe loukeure, parfonde et wespiyante. I n’ esteut nén po dire hôt so pate. Avou s’ morete pea et ses noers tchiveas ‒ la k’ aspitént dedja sacwants metchrons årdjintés ‒ on veyeut bén k’ i n’ esteut nén d’ on sonk « did par la ».
I s’ winnéve dins li spexheur, a môde d’ ombion. Ca l’ anuti atakéve a-z ewalper li mwaisse veye otrichyinne.
I rotéve piyam miyam, sins s’ dispaitchî, sol voye di halaedje. Volaveut ddja dijh anêyes k’ i n’ aveut pus oyou cori ciste aiwe la, ci grand mouze la. Tote ci termene la, sins måy saveur raloukî li stindêye del toele di si aiwe ! Sins l’ sepi vey come asteure, ki fruzixheut dizo l’ pitite frisse air del nute.
Ci zuvion la lyi apoirtéve des hinêyes des fleurs do prétins. End aveut i a rdoxhe e cisse vå la ! Ene vå ravôtieye di montinnes ki les cresses s’ advinént låvå, al roye do cir, abrotchant divins l’ noeristé. Et dins l’ schô del vå, ene frawiante veye : Wîne [Vienne].
L’ ome somadja, londjinniveuzmint. On sospir k’ aveut sourdou do fond d’ ene åme dicweleye.
A trinte-nouv ans, il esteut dedja ricnoxhou come on mwaisse, ostant a Wîne ki pa djudla. Pattavå l’ payis, et pår a l’ etrindjir, on préjhive si talint. On clatchive des mwins po ses ouves. Les djins ‒ aprume les ci ki håbitént les sålons del mwaisse veye ‒ estént emacralés pa ses improvizåcions. Leus orayes s’ efoufiént. Bref a ça, il emidjoléve. Sins nole dotance, il esteut aconté etur les compozeus d’ muzike les plus rlomés ki l’ Urope n’ ouxhe måy veyou skepyî. I s’ poleut don pawiner. Oyi, da, ca il esteut ricnoxhou pa tertos come on mwaisse.
Portant, gn aveut on pû e djeu. Si marmouzant caractere disrindjive. Il esteut, sapinse k’ on n’ dit, on haeyåve tchén. On vraiy diåle-e-coir. Ene sakî prusteye di grandiveusté.
Totes les cmeres del hôte societé d’ Wîne si forvantént d’ esse di ses hantijhes, mins nole di zeles ni l’ åreut volou spozer. Si cdujhance a pårt, candjante et misterieuse, les aveut tertotes discoraedjî. Al copete do tchena, i n’ esteut nén sôrti do minme tonea k’ zeles.
On novea somadjon, a schåyî voste åme, vénve hushtiner l’ pwetrene do grand compôzeu. I s’ clintcha so les bleuwès aiwes do Danube. Il î rlouca li rglatixhaedje di s’ djaive, åzès fenès royes ey ås grands clairs ouys. On coixhe riya finda ses lepes. I l’ veya loumant s’ tinre vizaedje, dizo ses tchveas doûs come del soye. Pocwè esteut i si peneus divant cisse vuzion la di s’ tiesse ? Pocwè esse si strindou divant ene forvuzion k’ el kitchessive dispoy sacwants moes ? Pocwè esse tofer insi, toplin d’ lai-m’-e-påye ?
Mins c’ esteut pår a ç’ moumint la ki, do fén fond di si åme d’ årtisse, n aveut sacwantès notes k’ aspitît, et dmorer cavolant e si esprit.
I cloya ses ouys. Ses doets estént ddja la djouwant so les tapes d’ on forveyou piyano. C’ esteut si åme ki, ådvins di s’ cour, endè texhive li melodeye.
Cwand il esteut divins on tél estat d’ inspiråcion, i n’ prindeut pus nole asteme å tins ki coreut. Il esteut come å parfond d’ on waeraxhe sidårniyon. N’ aveut pus rén d’ ôte ki contéve, foû di ciste air sourdowe des parfondeurs di s’ coir. Ene muzike tote nouve si dessinéve, pitchote a midjote. Ci n’ esteut nén lu ki l’ edvintéve : c’ ere l’ aiwe di Danube, al vesprêye tote basse. Et, copurade, c’ ît l’ imådje d’ ene kimere k’ i veyeut voltî. A cori loigne !
Ciete, n aveut co mezåjhe di rtravayî ciste esbåtche la. El faleut rabloucner, pu l’ rashir a môde di pårticion. Mins dins si åme, les cotoûs del melodeye avént ddja stî astokés. Avou ça ki l’ no di ç’ novea boket la esteut ddja tot trové. Ene låme rida foû sol blarêye [imberbe] tchife do grand ome. Ca ç’ no la fijheut raspiter ene sofrixhance ki nouk di ses succès n’ aveut seu schover evoye.
C’ est l’ zuvion del friskete k’ epoirta dins s’ mistere li no k’ il aveut zûné tot doûcetmint, mo tinrûlmint :
- Elize…
- Elize…