- On n' vos a nén veyou ayir !
- Dj' a stî ritnou.
- Ritnou ! Ritnou ! Mins pa cwè, don ! Vos n' estoz nén bén adlé mi ?
- O ça, siya ! Mins on-z eteréve li vî baron a Såvnire.
- Li baron !? Vos estoz d' famile avou l' parintêye ?
- Nonna, mins dj' aveu yeu dandjî d' lu po mi rcomander vola ddja sacwants anêyes.
- Vos rcomander ?
- Oyi, po èn ovraedje.
- Èn ovraedje, vos !!! Mins vos n' savoz ddja clawer on clå sins vos blener. Et cwand dji vos dmande ene sacwè, vos spiter evoye come on pû. Co pus roed ki l' vint d' bijhe.
- La, vos m' racontez del crake, don ! Nén pus tård ki l' moes k' est houte, dj' a co stî fé vos coûsses.
- Oyi, paski vos estîz shinmyî a rén et ki dji vs aveu prusté sacwants liårds, po-z awè d' l' amindjî. Vos n' m' avoz nén co rindou l' manoye, dayeur ! Vos l' avoz tnou po l' ofrande, sins manke !?
- Tot djusse. Dji n' aveu djamåy yeu l' tins di lyi aler dire on ptit merci, å baron. Dji lyi dveu bén ça !
- Et vos avoz ratindou k' i casse si pupe po lyi ramoenner l' manoye di s' pîce, cwè. Et dji wadje ki l' ofrande a prins tot li dmey djoû et co tote l' après-prandjire, come dabitude.
- Bén, Piconete, vos m' kinoxhoz bén, don. Dji n' so nén pus må-elevé k' èn ôte. Et cwand on vos preye po l' après-messe, vos estoz bén oblidjî.
- O oyi ça ! Padzeu tote, i gn a des gotes. Dji vos conoxhe, la, monparan, come si dj' vos åreu yeu fwait mi-minme.
- Alez ! Vos n' vos alez nén mwaijhler paski dj' a stî fé oneur a on vî soçon, don !
- Oblidjî ? Fé oneur ? Totès emantcheures da vos, ça, po rsouwer li pus d' verkins possibe. Et on vos årè co ramoenné a berwete, a totes les eures. C' est todi l' minme avou vos. On côp ki vs estoz dins les gotes, i gn a pus moyén d' vos rawè. Li diåle m' apice, si dji n' di nén vraiy.
- Fåt nén maxhî l' diåle a tot ça. Ça a stî avou l' novea curé.
- Pocwè ? I leve bén l' keute eto, lu ?
- Ba ! Dji nel vôreu nén rescontrer tos les djoûs. S' i n' a nén stî spani avou on soret, il a todi po shure.
- On novea curé a Såvnire.
- Oyi, et i m' a dit k' i vos aveut veyou sol martchî d' Djiblou l' vénrdi passé. Et k' i vos avîz tourné vosse tiesse, et fé shonnance di nel nén riconoxhe.
- Dji n' a pont veyou d' curé sol martchî. Vos n' m' alez nén dire ki vos avoz soçné tote l' après-prandjire avou èn ome ås cotes, tolminme ?!
- Come dji vos l' di ! Et i n' è poitnut pupont, don, des cotes, li djoû d' ådjourdu. Il a minme prins d' vos noveles.
- Des noveles da mi ? Nos estans d' conixhance ?
- Dji n' ireu nén sca la. Mins i m' a leyî etinde ki vos tchantîz come on pinson cwand vos estîz pus djonne.
- Bén ! Dji n' a pus djamåy tchanté dispu mes grandès påkes.
- I gn a po croere ki vos les avoz fwait eshonne, dazår. I n' a nén k' mi k' a må tourné, a m' shonnance.
- Vos m' è bôrez co ene po vos disdwaner, don, vos.
- Nonna ! Lon erî d' mi ! I m' a minme leyî etinde di vos montîz å docså eshonne cwand vos estîz co å catrucime. Et tchanter « A bas la calotte ! » po fé dåner les macherseurs. Co ene sacwè ki vos m' avoz todi catchî.
- Hê, hê ! Dji n' vos a djamåy dimandé l' coleur di vosse panea, don, mi ! Cwè fjhîz, vos, a doze ans ?
- Dji n' beveu todi nén l' vén do curé a catchete dins l' sacristeye avou des djonnès crapådes, mi.
- Ça n' fwait rén. Asteure, vos n' è mankez djamåy ene, d' ocåzion, po vos ratraper.
- Hôw ! Vos n' vos alez nén mwaijhler paski dj' a bevou ene pitite gote avou vosse prumî galant, edon.
- Prumî galant ! Prumî galant ? Ci sereut l' gamén d' amon Delfosse ? Waite ! I n' åreut nén må tourné, dji sereu kécfeye co avou lu. Et nén avou on mårticot parey a vos ki m' cache mizere a tot moumint, et k' on n' voet ki cwand il a dandjî d' cwårs po-z aler fote e s' coco.
- Hê ! Vos m' fijhoz ene sinne, la, po on ptit vere ki dj' boe avou l' curé d' Såvnire.
- Et vos, vos estoz djalot pask' ila stî mi prumî galant cwand on-z esteut co e scole. … Hê ! Schoûtez ! I soune a moirt a l' eglijhe di Djiblou.
- C' est todi nén pol baron. On l' a poirté e tere ayir.
- Ça serè nosse doyén ki tchantrè messe polmoirt ?
- Pôve djin. Plait-st a Diè d' el prinde e schô !
- Nos irans a l' ofrande eshonne, don, Tchirou.
- Tinoz ! Dji vos va rmete vosse manoye.
- Vos m' volîz fé dåner, don !
- Bén seur, mi ptite poyete ! Et vinoz radmint dins l' minne, di schô, ki dj' vos rabresse.
Li tecse serè dazår rashonné ene ramexhnêye di tecses dizo tite « RIM-RAM 2021 »