Copene:L’ etermint do baron d’ Såvnire
Radjouter on sudjetL’ètêremint dè l’ baron d’ Sauvenêre (Dins l’ lingadje dë Mélin-Djodogne)
- On n’ vos-a ni vèyë ayîr ! - Dj’a stî rët’në. - Rët’në ! Rët’në ! Mins pa qwè, don ? Vos n’èstoz ni bén ad’lé më ? - Ô ça, siya ! Mins on-z-ètêréve lë vî baron à Sauv’nêre. - Lë baron !? Vos-èstoz d’ famële avou l’ parintéye ? - Non.na, mins dj’avo yë dandjî d’ lë po më r’comander vola d’dja saquants-anéyes. - Vos r’comander !? - Oyë por on-ovradje. - On-ovradje, vos !!! Mins vos n’ savoz d’djà clawer on clô sins vos blèner. Èt quand djë vos d’mande one saqwè, vos spëter èvôye come on pû. Co pës rwèd quë l’ vint d’ bîje. - Là, vos m’ racontoz one crake, don ! Ni pës taurd quë l’ mwès qu’èst yëte, dj’a co stî fé vos coûsses. - Oyë, pace quë v’s-èstîz chumî à rén èt qu’ djë v’s-avo prësté saquants liârds, po-z-avë d’ l’amindjî. Vos n’ m’avoz ni co rindë l’ manôye, d’ayieûr ! Vos l’avoz t’në po l’ ofrande, sins manque ! - Tot jësse. Djë n’avo jamaîs yë l’ timps d’ lî aler dîre on p’têt mèrcë, à l’ baron ! Djë lî d’véve bén ça ! - Èt vos-avoz ratindë qu’ë casse së pëpe, po lî ramin.ner l’ manôye dë s’ pîce, qwè. Èt djë wadje quë l’ofrande à prins tot lë d’mé djoû èt co tote l’après prandjêre, come d’abëtëde. - Bén, Piconète, vos m' conèchoz bén, don. Djë n’so ni pës mau èlèvé qu’on-ôte. Èt quand on vos prîye po l’après mèsse, vos-èstoz bén oblëdjî ! - Ô siya ça ! Pad’zeû tot, s’ë-n-a dès gotes. Djë vos conè, là mon pârent, come së dj’ vos-aro yë faît më minme ! - Alez, vos n’ vos-aloz ni mwaijeler pace quë dj’a stî fé oneûr à on vî soçon, don ! - Oblëdjî ? Fé oneûr ? Totès-èmantchûres da vos, ça, po r’ssouwer lë d’pës d’ verkins possëbe ! èt on vos-arè co ramin.né à bèrwète, à totes lès-eûres. C’èst todë l’ minme avou vos. On côp quë
v’s-èstoz dins lès gotes, ë n’a pës moyén d’ vos royë. Lë diâle m’apëce së djë n’ dë ni l’ vrai !
- Faut ni machî l’ diâle à tot ça. Ça a stî avou l’ novia këré. - Poqwè, ë lève bén l’ coûde èto, lë ? - Bâ ! Djë nè l’ vouro ni rèscontrer tos lès djoûs. S’ë n’a ni stî spanë avou on sorèt, ël a todë po sûre ! - On novia këré à Sauv’nêre ? - Oyë, èt ë m’a dë qu’ë vos-avoz vèyë së l’ mârtchi d’ Djëblou, vinrdë passé. Èt qu’ vos-avîz toûrné vosse tièse èt fé chonance dë nè l’ ni r’conèche. - Djë n’a pont vèyë d’ këré së l’ mârtchi. Vos n’ m’aloz ni dîre quë v’s-avoz soç’né tote l’après-prandjêre avou on-ome à cote, tot l’ minme ! - Come djë vos l’ dët ! Èt, ë n’è pwatenèt pëpont, don, dès cotes, lë djoû d’audjoûrdë. Ël a minme prins d’ vos novèles. - Dès novèles da më ? Nos-èstans d’ conèchance ? - Djë n’iro ni squ’à là. Mins, ë m’a lèyî ètinde quë vos tchantîz come on pénson quand vos-èstîz pës djon.ne. - Bén, djë n’a pës jamaîs tchanté dëspôy mès grandès pauques. - Ë-n-a po crwêre quë vos lès-avoz faît èchone, d’asârd. Ë-n'a ni qu’ më qu’a mau toûrné, à m’ chonance. - Vos m’è bourez cor one po vos dësdouwaner , don, vos. - Non.na, lon èri d’ më ! Ë m’a minme lèyî ètinde quë vos grëpiz èchone au docsau quand vos-èstîz co au catrècëme. Èt tchanter : « À bas la calote. » po fé dâner lès machères-seûrs. Co todë one
saqwè quë v’ m’avoz todë catchî.
- Ê, Ê ! djë n’ vos a jamaîs d’mandé l’ coleûr dë vosse pagne, don, më ! Qwè fyiz, vos, à doze ans ?! - Djë n’ bèvéve todë ni l’ vén dè l’ këré à catchète dins l’ sacrëstîye avou dès djon.nès crapôdes, më ! - Ça n’ faît rén. Asteûre, vos n’è manquez jamaîs one, d’ocâsion, po vos rattraper ! - Auwe ! Vos n’ vos-aloz ni mwaijeler pace quë dj’a bèvë one pëtëte gote avou vosse prëmî galant, don. - Prëmî galant ! Prëmî galant ? ça sèrot l’ gamin d’amon Dèlfosse ? Waîte, ë-n’ârot ni mau toûrné, djë sèro quétefîye co aclapéye avou lë. Èt ni avou on maurtëcot parèy à vos, quë m’ cache mësére
à tot momint, èt qu’on n’ vwèt quë quand ël a dandjî d’ caurs po-z-aler foute è s’ coco.
- Ê ! Vos m’ fioz one sin.ne, là, por on p’tët vêre quë dj’ bwè avou l’ këré d’ Sauv’nêre. - Èt vos, vos-èstoz djaloûs pace qu’ël a stî m’ prëmî galant dë d’ quand nos-èstîn’ co è scole… Ê ! choûtoz : ë sone à mwârt à l’èglîje dë Djëblou. - C’èst todë ni po l’ baron, on l’a pwârté è têre ayîr ! - Ça sèrè nosse doyén quë va tchanter mèsse po l’ mwârt. - Pôve djins, plaît-st-à Dië dè l’ prinde à choû ! - Nos-irans à l’ofrande èchone don, Tchirou ! - Tenoz, djë m’ vos va r’mète vosse manôye. - Vos m’ volîz fé dâner, don ! - Bén seûr, më p’tëte poyète ! èt venoz rademint dins l’ ménk dë choû, quë dj’ vos rabrèsse.
Démarrer une discussion sur L’ etermint do baron d’ Såvnire
Les pages de discussion sont l’endroit où diverses personnes peuvent discuter de la manière d’améliorer le contenu de Wikisource. Vous pouvez utiliser cette page pour démarrer une discussion avec les autres utilisateurs sur la façon d’améliorer la page « L’ etermint do baron d’ Såvnire ».
