L’ARONDE EIÉT LÈS JONNES DÈ MOUCHONS.
Enne vie aronde, qu’avet bin woéagi,
Qu’avet sti dain pu d’in payi,
Woètet des jônnes mouchons, au tins qu’on semme ell’channe
Et pou leu pia, l’jumit, l’trianne !
Elle leu dit : més zeffants, vo s’tet co tout pélots,
« Voéyez bin m’n’homme lauvau, ôssi s’bras à purette,
« Et bin, s’qui tappe, c’est pou vo piette !
« Pasqué mi j’saurai bien foute ell’camp dain les bots !
« I mettront dés trappes à pierrots,
« Si vo stet pris, gâre ell’cass’rolle !
« Ou bin vo d’iret dain l’gayolle !
« Oussi Choutemme nia qu’in moéyin :
« C’est dé spépii tout l’grain.
— I mingint tout costet, i s’foutint bin d’l’aronde !
— « Betchi tout l’grain ! woétet qué conte !
— Quand l’channe a ieu créchi,
« Elle leu dit : faut sat’chi,
« Toute ess’n’ieppe là, ou bin, vos estet amanchis !
— « Taiche-tu, d’sint-ti, tu no zin fout d’louvrâche !
« Fai l’blouque, clau t’bêtche, avet tous tes ramâches :
« I fauret co pu d’mille mouchons,
« Pou d’allé cruauder l’channe dé no zinvirons.
L’moèche grenne crèche toudi rade !
— « Elle leû dit co : ça n’va né bin !
« Mai pusqué vo pinset, q’jé vo fout n’ couyonnade,
« Co în conseye, et pou l’derrin :
« Quand vo viret pa l’channe, l’terre viette jusqu’à l’coupette,
« Et q’les tindeux prindront : Tâche, masinche, carcayette,
« Pa leu tindries, miroès, baguettes dé glou,
« D’meuret à vo mogeonne, et n’mouftet né du tout.
« Ou bin canget d’payi comme elle grue et l’bégasse,
Et si vo sti trop lasse,
Ni cric ni crac, pou iesse pu sûr,
Stichet vou rade dain l’trau d’in mûr,
« Au liœu d’chouter l’aronde, qui se fiét du mau, dé l’poène,
I fieînt « chirippe » tertous échenne !
I s’d’ont mougni leu zonques, et i s’d’ont bin r’pinti !
Il’ont sintu trop taure qu’elle n’avet né minti :
Brammin d’ieuses, ont cheu dain l’z’atrappes !
On l’zinserre dain n’gayolle, dain l’queuwet on les tappe.
Nô stons comme les mouchons ; no stons tertous tiestûs,
No n’v’lons chouter nulu, et fai tout à no tiesse,
No n’voéyons q’nous d’malin ! In conséyeu, c’t’enne biesse,
Nia q’quand nos estons prîs, q’no d’sons q’no né l’frons pu.