C’est hû lu veûye du Saint-Martin,
Nos avans fini scole à teimps :
Effilans donc les vihès banses
Et les chainas sins anse !
Lâ ! la ! lala ! etc.
Chairgeans jâbes du strain et fahais,
Nu rouvians nein les vîs tonnais !
Qu’i plouhe, qu’i nive, qu’i tonne, qu’i jale,
Nos taprans tot à spale.
Preindans avou cinq, six ramons,
Des blancs d’ sol fat : is sont si bons !
S’on ls’a méme happé so les horres,
Les maîsses enn’ ont bein d’core !
Montans en amont do croupet :
Nos espreindrans qwand qu’i frait spais,
Et noste éveûye serait l’ pus belle,
Les geints spâgn’ront l’ chandelle.
Vone-là l’ feu qui s’èlive o l’air :
Loukoz donc on pau ciste affaire !
C’est todis noste bâne lu pus foite ;
C’est co leie qui l’èpoite.
Tot l’ monde crit : C’est on saqwei d’ bai !
Nos autes, nos breyans comme des vais
Et nos zoulans âtou des flammes
Avoul ramon qui blamme.
Po rudheinde broûlans noste dierain.
Chantans, crians ! c’est l’ St-Martin.
Corans en al vallée dol vôye
Tot nos sewant al rôye.
Nos avans fait lu Saint-Martin,
Çu serait dusqu’à l’an qui veint.
Et qwand n’ mourrans, i s’ trouvrait ds’autes
Qui sûront noste vîhe mode.