Lu vî tchêne domine co l’ valée
mâgré l’s-an.nées èt lès rafales,
come cès djins qui n’ polèt ‘nn’ aler
pace quu Diu n’ lès vout nin, ni l’ diâle.
Âs-ôtes, avou quî ‘l a crèhou,
lu cougnie d’na lu r’pwas do l’ mwart;
i nn’a qu’ lu qu’èle n’âhe nin volou
arâyî à k’ssincèdje dès r’mwards…
Et qwand l’ djône prétins sème à flohe
fleûrs èt vèrdeûr so hâyes èt bwas,
po qu’i lès vwale, i stind sès cohes
honteûses d’aveûr sièrvi l’ bouria.
Adon, pus franc, drèssant s’ tièsse sombe
foû d’one mér du r’gons qui s’ dorèt,
po qu’i v’nèhe su r’haper è si-ombe,
i houke lès passants — qui l’ fîdèt.
Mês qwand l’ freûde bîhe anonce l’ îvièr,
qu’èzès brantches noues s’ vint plinde lu vint,
quu l’éye do l’ mwart plane duzeû l’ tièr,
tot frûsinant, l’âbe su sovint…
I r’veût, à l’ flâwe louweûr dès steûles,
qwand tot-ôte feû s’a dustindou,
hisdeûse, avanci so lu steûle
vèrs lu, l’ porcèssion dès pindous.
Voleûrs èt moudréres èt complices
qu’ourint lès mimbes kumèsburdjîs
passèt so l’ place du leû suplice
èt k’fèssèt tot hôt leûs pètchîs.
Mês, pus tèribe, on cri d’ vindjince
domine leûs criminélès vwas :
èt l’ tchêne tronle duvant l’inocince
qui d’zos sès cohês pèriha !
Et, o l’ campagne qui va mori,
— chaque cohète gotante du broheûr —
i lîve lès brès’ vè l’ cî r’covri,
come onk qui s’ rupint èt qui pleûre…
Eplaideye aprume e l' Armonac walon dol «Saméne» po l’an 1904, Måmdiy, pp. 65-67; ratournaedje e francès dins l' Antolodjeye Piron (trovåve cial p. 359-360).