On p’tët rë s’avot dët :
« Dj’ vous grandë
» Sënon cë n’èst wêre lë pwène
» Dë broker s’-t-êwe foû dè s’ fontène
» Èt dë d’mèrer
» Catchë d’zos lès ièbes din-r-on pré.
» Djë vous ièsse on rë d’importance.
» Avaurcë djë n’a wêre dë chance
» Dë jamaîs p’lë fé causer d’ më :
» Djë troverè pus lon dès-amës.
» C’è-st-à m’ toûr à fé l’ toûr dè monde
» S’ën-a mëstere, ë faut qu’ djè l’ sonde,
» Ç’ qu’ë n-a pës lon, dj’ vous l’ soyë :
» À m’ toûr, djë vous veûy dè payës. »
Clér èt spëtant, më rë djëbote
Èt diskind d’one alûre së sote
Quë lès fleûrs, è l’ vèyant passer,
Dins l’ pachës, si fô, si prèssé
È sont co totes èmèrvèyîyes.
Mins volà s’-t-êwe qu’est d’dja brouyîye
Dès sankësses èt dès man.nèstés
Qu’ë rachone aus rûwes dès moléns,
Dins lès tanerîyes, dins lès vëladjes
Së bén quë por on bout d’ voyadje
C’èst t’t-au pës s’ vos l’ rëmètrîz co
Èt portant djë n’ vos dës nén tot.
Djë n’ vos cause nén dès-avanîyes
Dès-afronts qu’on lî faît quétch’fîye.
Après on-oradje — on l’ conçwèt —
Volà m’ rë djène come on tchènwès ;
Èt s’-t-êwe èst po todë gâtéye
Qu’ c’è-st-a-z-oyë l’âme disgostéye ;
Mins pus rén n’ sârot l’èspêtchî !
Passant yëte dë bén dès clotchîs,
Ë rèsconterè on camarâde,
Pës grand, pës fwârt, dë pës d’ parâde :
Avou come dès-aîrs protècteûrs.
Èt dès complimints en doûceûr,
Më nayëf s’èsplëque èt raconte,
Po s’ fé valë, va s’ mète èsconte
Ës sont béntôt brès d’zeûs brès d’zos
Contints d’-n-on l’ôte, më rë pës sot.
On-aleûve intrer dins one vële :
Po s’ rassûrer, m’ djon.nia s’ faufële
Po dîre dins l’ôte : dèspeûy adon
On n’ènn’a pës causé pus lon.
Sondjîz vos-min.me à ç’ quë ça rëme
N’èst-ç’ nén come ça qu’on vos suprëme !
Dë ç’ timps-là, dj’ laîrè r’pwaser m’ plëme.