LÉ RNAU EIÉT L’VI COQ.
Tout à l’coupette d’enne saû, in coq estèt pierchi,
Mai in coq copu fin qué n’fée !
In R’nau qui v’lét l’croqué, l’erwètét bin d’achi,
In d’sant dé n’pétite vœx flûtée —
« Hé ! vi cousis ! nia du nouvia dain l’zinvirons !
« No stons tertous r’mîs camarades échenne,
« Vo n’avét pu dangi d’rescuré vos spourons !
« Desquins qué j’té rabrasse, sû t’betche ou d’sû t’boudenne,
« C’est bîn fini on n’sin vout pu.
« Et l’pai a stî faite aujourdhu !
« Mai d’éspèche tu, desquins tout d’chutte,
« Pasqué j’ai n’commission à d’allé fai d’vant l’niutte,
« Vous autes vôs avét l’tins,
« D’couri aprèt les pouyes eiét d’roulé vos bosses !
« Vo stét tertous dés fameux losses !
« D’viqui ainsi vo d’vét bin iesse contints !
« Allo ! aprestét vous nô f’rons les waufes au soêre.
« Eiét pou passé l’chige, nô z’appôtrons à boère !
I nô faut avoé du plaigi,
Comme si c’estét l’ducasse,
Allô ! vi fré, vi s’tôt, vins rade qué j’té rabrasse.
— « Vi coûsse, disti l’Coq sain bougi,
Vo n’auri né su v’ni m’aprinde
Enne nouvelle pou m’fai ostant d’bin,
Rattins n’miette, jé m’va desquinde,
« Mai j’voès l’auvau deux chins,
« Ça m’a l’aire dé iesse dés chins d’chesse !
« Et daujureux qui venne nu à nô fiesse,
« I vont l’train d’in démon ? I s’ront tout d’chutte droci,
« Et nô pourrons échenne nô rabrassi !
— Lé R’nau sintét l’paquét ! i n’a né d’mindét s’conte
— Arvoère, disti, jè m’va fai m’commission.
« Et pou l’fiesse in question, informét zin tout l’monde,
« No r’mettrons ça à enne aute occasion :
— Et là d’su s’queuwe clappée intrét sés j’ambes,
I fout l’camp tout pénau du costêt d’Sambe ;
Eiét l’coq, in li même, riét comme in pierdu,
D’avoé sti pou rin si s’trindu.
Quand on couyonne ell’sîn qui s’fout volti dés geins,
On z’est co bin l’doube pu contint.
C’fauve cî no mousse enne saquoé d’sure :
Fin contrét fin nia né d’doublure !