En-évèn’mint qui dji chû tous l’s-ans dins l’bwêsse à imâdjes, c’èst l’Paris-Dakar. Dj’aveu don dècidè di vos d’è d’viser. On pout l’vîr voltî ou bén nén, i faut r ‘conèche qui c’èst toudis in grand momint en wèyant lès saut’lâdjes dins l’désèrt.
El cén qu’a mètu en tch’mwin s’coûsse-là, Thièry Sabine, a yeû in côp d’génîye. Si d’ès’timps, i gn-aveut co pont d’GPS, di balîses satèlites èt tout l’Sint Trembèl’mint qu’nos-avons asteûre, lès coureûs p’lit s’piède dins l’désert. Eyèt min.me piède leû vîye ! En 29 édicîyons, i gn-a dèdjà yeû 47 môrts. A l’eûre d’audjourd’hu, rén d’tout çoulà. Mins bén pîre ! Lès tèrorisses ont yeû l’dérin mot. El trentième Dakar a stî anulè pou dès résons d’sécuritè. Lès 570 équipâdjes ont ètindu l’dirècteûr Etiène Lavigne. C’èst quasimint trwès mile djins disbautchîs qu’ont râlè à leû maujo. Mins èyu-ç’qu’on èva ? A l’Capitâle, on-a suprimè l’feû d’ârtifice, èyèt asteûre v’là qu’ç’è-st-in spôrt qui pâye lès pots cassès. C’èst l’vré qu’en-Afrique, i gn-a souvint dès risques pus grands qu’amon nos-autes. Mins l’monde du spôrt dwèt l’payî tchêr. Dj’èspère ètou qu’ène téle mesûre ènn’va nén doner dès-idéyes à dès tèrorisses qui pourit s’ataquer à d’s-autès manifèstâcîyons.
Parètreut qu’tous lès drwèts d’ègadj’mints ont stî rèboursès aus concurents. El budjèt totâl è-st-en mwèyène di cint mile euros pa équipâdje, mins dès céns pass’nut l’mîyon. D’acôrd, mins lès coureûs âront du mau di convinque leûs sponsôrs qui tèn’nut à profiter d’leû n’invèstiss’mint. Sins compter qui dès payîs come èl Maroc, èl Sénégâl èyèt ètou l’Mauritanîye crwèyît d’è profiter su l’plan locâl avou l’vinte dès-afêres du cwin. Divant çoulà, on aveut dèdjà suprimè dès-ètapes au Mali, au Niger èt en Algérîye. On-èst lon èrî di l’anéye 1983 woù-ç’qu’in bèlge, Jacky Ickx aveut rèpôrtè l’Dakar (avou Claude Brasseur). A propos d’vwètûres, lès céns qui n’wèy’nut nén voltî lès coûsses moustèr’nut du dwègt l’gaspîyâdje di prodwuits pétrolièrs èyèt ètou l’polucîyon. Dès spécialisses ont studi qui l’émissîyon n’èsteut nén pus fôrte qu’à in Grand Pris d’Fôrmule yin. Quant à l’consomâcîyon, ça s’reut come ène djoûrnéye di toudis dins l’circulâcîyon su lès 40 kulomètes du périférique di Paris.
Lès pièdes di liârds, i gn-a ètou dins saquantès PME. Dji pinse à yène di Goch’lîyes qu’aveut stî chwèsîye pa l’organisateûr. Ele diveut mète su lès véhicules d’assistance in GPS di leû n-advincîyon. Lès djins n’ont nén yeû l’preûve d’èl qualitè du tchinisse. Vos l’wèyèz, gn-a bran.mint d’afêres qui toûn’nut autou d’èl coûsse. Dins l’aventûre, gn-a rén à r’tènu. Sinon dès djins qu’ont r’loupè in fameûs bouyon.
Quant au Dakar, l’è r’vîra t’on en-Afrique ? Mi, dji pinse pus râde à l’vèrsîyon 2009 en-Amèrique du Sud. L’av’nir nos l’aprindra… Avou l’èspwêr qui lès tèrorisses di toutes lès cougnes…lèyîjent binauje lès spôrts…èyèt tous lès-autes djins d’ayeûrs !