Et bén v’là, on l’ratindeut come in tchat après n’soris. El Grand Pris d’Francôrtchamps è-st-arivè. Come èm’ vijin Fons aveut dècidè d’è d-aler, dji m’é proposè d’passer trwès djoûs lauvau avou lî. Dji n’l-èr’grète nén. Mins m’compte en banque oyî. Mins pou in côp ... L’èspèctaque d’è valeut lès pwênes, c’èst seûr ! Dèdjà l’vèrdi, pou l’èssay’s libes, i f’yeut bon timps èt gn-aveut 20 degrès. Fons m’aveut d’mandè d’è d-aler dins-ène tente, mins dj’è v’lu chwèsi in châlèt. Tu pâles, dj’aveu compris 50 euros au tèlèfone, mins c’èsteut 500. Em’ vijin, qui d’veu payî l’mitant, l’a mau pris. Dèdjà qu’il aveut disboursè 36 euros pou l’pârquing èyèt co dîj pou l’programe… Si on rajoute qu’i faleut compter 5 euros pou in satchot d’frites èyèt l’mitant pou ène crasse pinte…
-Et come on n’d-è bwèt nén qu’yène …
Mins co in côp, vîr lès tchampîyons d’èl Formule Yin toûrner pa-d’vant vos-îs è-st-ène aute afêre qui dins l’bwêsse à imâdjes. On èst dirècque dins l’ambîyance. Pou l’èr’toûr du Grand pris, c’èsteut bén pou discouvru l’nouvia circwuit èyèt tèster lès gomes. D’èl samwêne, lès gazètîs avit bran.mint d’visè dès « à costès » avou Mac Laren condanè pou èspîyonâdje su Fèrari insi qui d’èl fôrte aminde en liârds sins roubliyî lès pwints pièrdus au class’mint du Grand Pris dès constructeûs.
Mins c’n-èst nén tous lès djoûs qu’on d’vise di no p’tit payîs dins l’monde ètîr ? C’èsteut l’cas saquants djoûs au mwès d’sètembe. Dj’aveu studi l’circwuit par coeûr èt gn-aveut trwès grands candj’mints avou l’aute. En yin, èl nouve chicane qui candje di costè avou n’coûte rintrèye pou l’ravitay’mint. En deûs, l’élardjiss’mint d’èl drwète line èyèt in pus grand disgadj’mint à l’sôrtîye. En trwès, in grand disgadj’mint dins l’virâdje qu’on lome di « l’antène chirurgicâle » .
- Cu qu’dj’é vèyu voltî, c’èst qu’on pâle ètou di bio-cârburants avou du blé, du colsa èyèt d’èl bèt’râve qui s’ront transfôrmès en étanol. C’è-st-in p’tit pourcintâdje, mins c’èst d’djà in cominch’mint. Notèz qu’i s’reut timps, pace qui mès-omes consom’nut cint lites d’essence pa eûre di couse èt pa vwètûre.
El sèm’di, lès deûs Ferari èstit en pôsicîyon yin èt deûs. Min.me istwêre pou l’dèpârt du dimègne. El coûse aveut bén cominchî avou l’tout preumî frin.nâdje à « l’source », èt çoulà pou lès quate preumîs. Pus lon dins l’cousse, i gn-a yeû saquants bias mouv’mints, èt çoulà surtout, grâce au miraculè di Montréal, Kubica, èyèt maugré l’rèplaç’mint d’ès’ moteûr. Après s’sôrtîye di route à Monza, Kimi Raikonen a gâgnî pou l’trwèsième côp à Francôrtchamps, pa-d’vant s’n-équipier Felipe Massa. Il avouwe ètou qu’c-èst s’circwuit préfèrè. Les Mac Laren d’Alonso èt di Hamilton ont fini djusse après.
Divant d’sôrti di d’lauvau, èm’pôrtè-foûyes a co yeû tchaud èt s’a co disvûdi. Dj’é ach’tè ène casquète Ferari èyèt in mayot da Schoumi : lès deûs pou 70 euros. Eûreûs’mint qu’i gn-a qu’in Grand pris pa anéye en Bèljique. Mins acrotchi dès loques, insi au meûr d’èm’ tchambe èst tout d’min.me pus bia qui d’claper dès bîyèts d’banque. Et come dîreut l’aute : Francôrtchamps, c’èst tout d’min.me èl pus bia circwuit du monde èt … il è-st-en Walonîye !