L’ôte djoû, dji vos-aveu d’vîsè du toûr di France èyèt dès bons momints passès grâce à Wout Van Aert qu’èsteut dins bran.mint dès bias côps. Audjoûrd’hu, c’è-st-au toûr da Remco Evenepoel qu’a dominè in grand toûr, èl cén d’Espane.
I gn-a longtimps qu’in coureû bèlje n’aveut pus rèyussi ène tèle victwêre.
Pourtant, après s’grave ac.cidint avou ène fractûre du bassin èyèt n’contûsîyon du poumon au toûr di Lombardie, woù il-a passè au-d’’zeû d’in pont èt s’a r’trouvè dins-in trô, bran.mint dès-èspéciâlisses èl crèyît fini pou l’èspôrt di waut nivau. C’èst quasimint in miraque di l’èrtrouver dins-ène èquipe di profèssionèls.
Et pourtant … Quarante anéyes après Johan De Muynck au toûr d’Italîye 78, Remco Evenepoel a triomfè d’èl Vuelta sins bran.mint trîyaner divant Enric Mas (Movistar) et Juan Ayuso (UAE-Team Emirates) qu’ont complètè èl podium. I s’ra probablèmint èl preumî qu’on imajine dèdjà rimpli.
Nos-ôtes lès bèljes, nos l’wèyît dèdjà gâgant dispus in bon momint tél.mint l’coureû controleut bén èl coûsse. Mins ès’ principâl advèrsére, Primoz Roglic, èl tripe gâgant d’èl Vuelta ’a d’vu lèyî là èl toûr à l’17 ième ètape après-awè tcheut. C’èsteut dins l’potche, à mwins toudis d’èn-ac.cidint si râde arivè. Faut nén roubliyî qui no tchampîyon aveut ètou pièrdu ès’ lieut’nant Julian Alaphilippe victime d’ène luc.sacîyon di l’èspale après-awè ètou tcheut su l’11 ième ètape.
Pour mi, èl pus bèle dès-ètapes, ça a stî èl 18 ième, au d’zeûs du Piornal. Au passâdje, il -a ètou raflè èl blanc mayot du mèyeû djon.ne.
Vos v’lèz co ène preûve qui l’ome d’è gagn’ra co dès grands toûrs. Et bén, si vos fèyèz l’totâl dès timps dès 2 chronos d’Utrecht èt d’Alicante, vos-arivèz à in totâl di 2 munutes èt 20 sucondes. A madrid, il-è-st-arivè avou 2’ èt 5 sucondes d’avance. Coulà vout dîre qu’èl coureû d’ èl Quick-Step a fét quasimint djeû égâl avou sès-advèrséres dins l’waute montagne. I faut dire ètou qu’èl "prodige di Schepdaal" n’a tout d’min.me qui 22 ans.
Dîre qu’èl coureû è-st-in vré spôrtif èst pus’ qu’ène vèritè. Cénq ans après-awè lèyî là acrotchî ès’ mayot di fotbaleû, il-a apougnî l’guidon d’in vélo avou lès résultats qui nos savons. Il-èst s’djoû-là d’vènu èl pus djon.ne coureû qu’a montè dissus ène mârche d’in podium d’in grand toûr dispus 1904.
N’eûchons nén peû d’èl dîre, Remco Evenepoel, du preumî au dérin djoû, a dominè èl toûr d’Espane. N’mîyète mètu à trèyins durant in wékène (Sierra de La Pandera et Sierra Nevada), il a râde fét di mète lès pwints d’su lès-îs. A pwêne èl montagne arivèye avou l’Pico Jano à l’6ième ètape, qui l’ome a fét èsploser lès favoris du toûr pou z-apougnî l’fameu roudje mayot di preumî èyèt n’pus l’lachî djusse qu’à l’fén.
Bén-ètindu, lès quèstîyons qui vont chûre sont tèrîbes : èst-ç’qui Remco Evenepoel dwèt daler au toûr di France ? Va t-i l’gâgnî ? Si l’ome i pinse sérieûs’mint, ès’ dirècteûr spôrtif pinse qui c’èst n’mîyète trop timpe.
Su s’lancéye, il-a râde yeû ène mèdâye di bronze aus tchampionats mondiâls di conte la monte. Eyèt surtout, il-èst d’vènu tchampîyon du monde à Wollongong en Australîye. Il-è-st-èvôye à 26 kulomètes di l’arivéye èyèt lès-autes ènn’ l’ont r’vèyu qu’près l’arivéye. A signâler ètou qui Van Aert a fini 4 ième. I v’neut insi d’ofru in 27 ième tite di tchampîyon du monde mon lès profèssionèls à no p’tit payîs.
Dîj ans djusse après in cèrtin Philippe Gilbert qui mèteut fén à ène cârière bén rimplîye. On poureut lomer çoulà in passâdje di pouvwêr.