El toûr di France d’ès’ n-anéye-ci valeut lès pwènes di yèsse chû. D’après lès-èspéciâlisses du spôrt, èyèt dji seû di leû n-avis, c’èsteut èt di d’lon, èl mèyeû dispus longtimps.
Non seûl’mint, gn-aveut deûs tchampîyons qui s’batît pou z-awè l’preumîyère place, mins dji dwè r’conèche qu’in trwèsième gayârd a v’nu animér èl toûr. Eyèt min.me p’tête di pus qui lès deûs-autes.
Si Vingegaard èyèt Pogacar ont fini èl contrére di l’anéye passéye, èl bèlje Wout Van Aert a stî l’grand animateû du toûr. Il a d’ayeûrs gâgnî 3 ètapes èyèt rèpôrtè èl vèrt mayot.
El toûr 2022 s’è daleut di Copenhague au Dan’mark avou à l’preumîyère ètape ène victwêre du bèlje Yves Lampaert. En-aute bèlje s’a fét r’mârquer en gâgnant 2 ètapes : J. Philipsen. V’là in bia résultat pou lès coureûs di no payîs. Djusse domâdje qu’i gn-aveut pont d’walon pou gâgnî ène ètape. No Philippe Gilbert, quand à li, d’èsteut à s’dérin toûr di France. Faut dîre qu’i va djoker s’cârière èyèt qu’il a 40 ans.
Quand dji vos d’vîseu da Wout Van Aert qu’a fét saut’ler l’loquèt su quasimint toutes lès-ètapes, on va d’è d’vîser.
Si dins lès preumîyèrès-ètapes, i ‘steut d’jà dins lès preumîs, pa après, on l’a vèyu au d’vant d’èl coûsse quasimint tous lès djoûs. Min.me dins lès-ètapes di montagne, i ‘steut là pou doner in côp d’mwin à Vingegaard. I pousseut min.me èl bouchon à pârti au cominch’mint di l’ètape pou z-awè dès munutes d’avance èyèt pus lon ratinde ès’ lidèr èyèt mwin.ner pou li doner in côp d’mwin adon qui lès-autes-èquipièrs èstit scrant. Van Aert a d’ayeûrs fini l’toûr en-èstant èl supèr combatif.
Qué n-èquipièr di chwès pou l’preumî. I faut r’conèche ètou qui s’n-èquipe, èl Jumbo, èsteut di d’lon, èl pus fôrte dès cènes qu’èstît au toûr ès’ n-anéye-ci.
Mins l’pus bèle ètape à mès-îs, c’èst l’18 ième di Lourdes à Hautacam.
C’èsteut l’dèrène ètape di montagne (dins lès Pirénéyes) quand Vingegaard a arivè avou pus d’ène munute d’avance su s’daufin Pogacar. Van Aert a fini trwèsième di l’ètape en donant in fameû côp d’mwin au preumî. Mins i gn-a n’saqwè a r’tènu qu’on d’vreut vîr dins tous lès spôrts èt ça arîve trop wêre. Pogacar a toûrnè trop laudje dins-in toûrnant èyèt s’a r’trouvè à l’têre.Adon, Vingegaard a ratindu èl blanc mayot pou continuwer èchène. N’mîyète après, Pogacar li a donè l’mwin en l’èrmèrciant. In djèsse qui mèriteut qu’on d’è pâle.
Mins l’quèstîyon qui bran.mint d’èspéciâlisses ès’ pôs’nut : èst-ç’qui Wout Van aert poureut gâgnî èl toûr di France (ou èn-aute grand toûr) yène di cès prochin.nès-anéyes ? V’là n’saqwè d’malaujî à rèsponde ! Pou m’paurt, i m’chène yèsse in supèr coureû, mins il-èst n’mîyète coûrt quand gn-a d’èl waute montagne. Pou lès cols di p’titès èt mwèyènes catégorîyes, gn-a pont d’trèyins à s’fé. Mins pou lès cols di super-catégorîyes, rolà, i m’chène qu’il-èst trop djusse. Dji voureut m’tromper, mins l’av’nîr nos l’dîra seûr’mint !