Saquants mwès après lès djeûs di Tokîyo, lès djeûs olympiques d’iviêr di 2022, oficîy’mint conu come lès XXIVᵉ djeûs olympiques d’iviêr, ès’ sont passès à Pékin en Chine du 4 au 20 di févrî 2022. Pékin a yeû lès djeûs au preumî côp en batant l’Vile di Almaty au Kazakhstan.
A chaque côp qu’i gn-a dès djeûs, èl Comité intèrnacîyonâl olympique (CIO) èrtrouve èl min.me trèyîn. Pourtant is d’mand’nut toudis di n’nén machî lès spôrts èyèt l’politique, mins çoulà n’èst wêre chût. Pékin 2022 ènn’ fét nén èc.cèpcîyon. Bran.mint dès payîs acus’nut l’Chine di « génocide » conte èl minoritè dès musulmans ouïgoure au Xinjiang èyèt ètou di n’nén chûre èl papî dès drwèts di l’ome.
El politique n’èst nén l’bénv’nûwe aus djeûs. Pourtant, èle èst co souvint là come à Anvers 1920 avou lès consèquences d’èl premîyière guère mondiâle, à Berlin en 1936 avou l’montéye du nazisme, à Melbourne en 1956 woù dès supôrtèrs ènn’ sont nén ralès dins leû payîs èl Ongrîye, à Mexico en 1968 avou l’pougne èrlevé du Black Power, à Munich en 1972 avou l’massacre dès israélîyens, à Toronto en 1976 avou l’'apartheid, avou Moscou en 1980 èt Los Angeles en 1984 pou l’guère frède , à Athènes en 2004 avou l’conflit israélo-palestinien sins roubliyî lès magoûyes di Rio en 2016.
Mins r’vènons pus râde au djeûs. On lès-a drouvu oficîyèl’mint pa ène cérémonîye woµ-ç’qui Xi Jinping qu’èst l’ Présidint d’èl république populére di Chine lès-a drouvu.
Su l’total, on compte 109 épreûves dins 15 disciplines avou pou chaque come récompinses aus trwès preumîs dès mèdâyes d’ôr, d’ardjint èt di bronze.
I gn-a dès pus bèlès épreuves qui d’s-autes : pa ècsimpe lès 20 kumomètes tout seû mon lès-omes en biathlon, èyèt ètou èl Super-G omes di ski alpin.
I faut sawè qu’i gn-aveut 3000 spôrtifs qui s’sont batus amical’mint dissus trwès sites : Pékin, Yanqing et Zhangjiakou.
Vèl-cî lès diférents spôrts : A Pékin, lès céns su l’glace come èl patinâdje ârtistique, di vitèsse, èl short track, èl hockey su glace èyèt èl curling.
A Yanqing, lès épreûves di ski alpin, di bobsleigh, di luge èt di skeleton. Adon, à Zhangjiakou gn-a yeû lès-épreuves di ski èt di snowboard freestyle, di ski di fond, di saut à ski, du combinè nôrdique èt du biathlon. C'èst l’skiathlon feumes, épreûve di ski d’fond, qu’a sacrè èl premîyière tchampîyone olympique di cès djeûs di 2022 èyèt c’èst l’norvéjîène Thèrèse Johaug, èl tripe tchampîyone du monde qu’a coudu l’ mèdâye d’ôr.
Pou no p’tit payîs qu’èst l’Bèljique, i n’faleut nén trop cwêre au père Nowé : ène mèdâye, c’èsteut quasimint impossîbe (qwè qu’is d’ont yeû 6 dispus l’cominch’mint dès djeûs d’iviêr). D’ayeûrs, èl comitè di no payîs distribûwe in diplôme quand yin di sès-atlhètes finit ène épreûve dins lès 8 preumîs.
Eyèt pourtant Hanne Desmet a rèpôrtè l’mèdâye di bronze en short-track sur le 1000m. El preumîyère pou no paîys pou cès djeûs di Pékin.
In p’tit-èspwêr ètou avou Kim Meylemans. C’èst l’èspéciâlisse du skeleton Sauf qu’èl coumère a stî en quarantène lauvau èyèt fini pa s’blèsser. Ele a fini 18 ième ! Mins gn-a yeû è mèdâye d’ôr da Bart Swings, en mass-start, qu’èst l’preumî tite olympique belje aus Djeûs olympiques d’iviêr dispus 1948.
Mins lès walons pul’nut yèsse fièr : c’è-st-èn-ârchitèque d’Yvoir qu’a fét l’tremplin djèyant di lauvau, rascrouvru avou d’èl nîve féte avou dès ventilateûs èyèt d’l-eûwe.