- Audjourd’hu, dji m’va vos d’vîser di moto ! Bén oyî, pace qu’on n’vîra pus in grand Mossieû dissus lès circwuits ! I s’a djokè di couru èl 14 di novembe 2021.
Valentino Rossi è-st-in pilote di moto. Il-a v’nu au monde èl 16 di févrî 1979 à Urbino en-Italîye. Il-a stî sacrè neuf côps tchampîyon du monde en Grand Pris moto dont sèt côps en 500 CC èyèt pa après en Moto GP.
El djèdi 5 d’awous’ à n’confèrence di gazètîs du grand Pris d’Autriche, il-a anoncè qu’i daleut djoker ès’ cârière di coureû à moto à l’fén d’èl séson. Et bén c’èst fét : is’djoke di couru.
Sins s’cârière, l’ome a yeû trwès surnôs : « Rossifumi » en 125 cm³ en omâdje au pilote japonais Norifumi Abe ; « Valentinik » en 250 cm³ en référence au éros di bindes dessinéyes qui s’lomeut Paperinik èyèt èl pus connu « The Doctor » en 500 cm3 èt Moto GP .
Bén qui neuf côps tchampîyon du monde, il-a toudis v’lu t’nu èl lumèrô 46 èt çoulà i l’tént d’ès’ pa Graziano. C’èst l’lumèrô qu’i pôrteut à s’preumîyère victwêre en Grand Pris. C’èsteut l’anéye qui Valentino a v’nu au monde.
Min.me si l’fameû lumèrô yin, qu’èst dèstinè au tchampîyon du monde s’èrtrouv’ra dissus l’cârcasse d’ès’moto. El lumèrô yin s’trouveut ètou dissus l’drwète èspale d’ès’ combinéson.
L’ome a fét n’tèrîbe cârière. Il-a cominchî à gagnî en Grand Pris en 1996 dins l’catégorîye 125 avou n’premîyère victwêre à Brno en rèpublike Tchèque. I d’vént l’anéye chûvante tchampîyon du monde maugré qu’il-èsteut grand (1,81 m).
Rad’mint en 1998, i passe dins l’catégorîye dès 250 come pilote oficièl di Aprilia èyèt finit deuzième du tchampyîonat … qu’i gâgne l’anéye d’après.
L’anéye 2000, Valentino signe in contrat avou l’fabrike Honda èyèt passe dins l’catégorîye qu’on lome rin.ne, lès 500. Rolà, i finit tout d’chûte deuzième du tchampîyonat du monde divant Kenny Roberts. Il-aveut gâgnî deûs Grands Pris.
Eyèt ça n’a nén trin.nè, rad’mint, en 2001, i rèpôrte èl tchampîyonat du monde 2001 dissus ène Honda NSR 500. Il-aveut stî 13 côps dissus lès mârches du podium. A c’momint-là, Rossi ocupeut d’djà ène place di chwès dins l’istwêre du Continentâl Circus.
- Bén oyî, à 23 ans, il-èsteut èl deuzième coureû italîyn au nombe di victwêres divant èl tèrîbe Giacomo Agostini !
En 2004, i s’èrtrouve mon Yamaha avou toute ès’ n-èquipe qui l’aveut chû èyèt i d’vént deûs-ans d’chûte èl tchampîyon du monde.
Gn-a yeû in p’tit passâdje à vûde. Mins en 2008 èt 2009, i r’divént tchampîyon du monde.
Pa après, i s’a blèssè, il-a yeû dès nwêrs momints mon Ducati èyèt a stî dé Yamaha. Il-a stî sakants côps vice-tchampîyon du monde, mins nén preumî. Eyèt en 2021, l’ome a anoncè qui c’èsteut s’dérène anéye en Moto GP avec Yamaha Petronas.
Maugré ène malaujîye séson qu’on poureut lomer « ène toûrnéye d’aur’vwêr », c’è-st-ène fameûse cârîyère lonque d’in quârt di sièque avou pus di 430 cousses qui s’achève. Ene vréye léjende d’èl moto.
Bén qu’ès’ cârîyère moto avou 115 victwêres (76 en Moto GP / 13 en 500 cm3 / 14 en 250 cm3 / 12 en 125 cm3) ès’ djoke insi. I va fé dès coûsses en-auto à pârti di 2022. A noter qui l’ome s’aveut dèdjà sayî à çoulà principal’mint au « Monza Rally Show » èyèt à sakants ralîyes.