- Gâgnî in Dakar n’èst seûr’mint nén aujîye. Mins l’rèpôrter ène dîjène di côps, c’èst tout d’min.me ène saqwè !
Dj’é don dècidè di vos d’vîser di Stephane Peterhansel. El français di 46 ans, vént di fièster èl victwêre pou l’dîjième côps. Qwè qui, c’èst l’quatième anéye qu’èl coûsse ès’ passeut en-Amèrique du Sud èt i n’aveut nén co gâgnî lauvau.
Dispus 2007, i coureut après l’chûvante victwêre.
I faut pacôps wêre di chôses pou d’vènu in tchampîyon. Wétèz in pau : èl pètit Stéphane, viès lès 8 ans, il a fét d’èl moto come ès’ papa. A douze ans, il a montè dissus ène planque à roulètes pou d’vènu tchampîyon d’France quate anéyes pus taurd. Ene mîyète pa après, il a r’vènu à l’moto pou fén d’l-enduro.
- Mins r’vènons au Dakar !
El Dakar 2012 èst yin dès pus deûr d’ès’n-istwêre. D’après lès-èspéciâlisses, c’èst surtout lès dérènès-ètapes diputéyes au Pérou qui d’è v’lît lès pwênes avou dès dunes come i gn-aveut divant en Mauritanîye. Quand dji pinse à l’tchaleû qu’i gn-aveut, i faut tout d’min.me awè ène boune condicîyon fisique. Vos-imajinèz in pau lès 45 degrés. Co mîyeû, dins l’vwètûre, on z-ariveut à 60 degrés ! Eyèt çoulà durant quate à chîj eûres d’ètape ! Stephane Peterhansel wèyeut voltî l’Dakar en Afrique.
- Il èst vré qu’c’èst rolà qu’il a v’nu au monde èt qu’il aveut sès racènes !
Pourtant, di l’Afrique à l’Amèrique du Sud, c’èst bran.mint di candj’mints. Lauvau, on pârteut dins dès grands pachîs sins l’présiynce dès-omes èyèt gn-aveut moyén d’ès’ piède durant dès djoûs ètîrs. Ene afêre qui n’èst pus l’min.me avou l’passîyon dès djins di l’aute continent. Figurèz-vous qu’à l’arivéye dins Lima, èl capitâle du Pérou, i gn-aveut ostant d’djins qui pou l’visite du pape Djan Paul II. Vos vos rindèz compte ! Min.me èl Présidint du Pérou s’aveut displacè.
Ah, èl coûsse n’èst nén prèsse di r’vènu en-Afrique. C’èst trop dandj’reûs. I gn-a yeû trop d’prîjes d’otâdjes èt d’atentas pou r’cominchî lauvau ! Min.me si ène coûsse come l’Africa Race ès’ fét en-Afrique.
- Dès djins d’amon nos-autes, nos nos d’mand’rîs comint fén pou gâgnî dîj côp èl Dakar.
A m’n-avis, i faut sawè mwin.ner come i faut. Mins t’t-au d’di long dès 9000 kulomètes, i faut qu’èl vwètûre tène èl côp èt n’eûche pont di problèmes mécaniques. Dji pinse ausès crèvésons, à l’boune ètinde avou s’co-mwin.neû. I faut ètou fén atincîyon à s’vwètûre. Tout çoulà, Stephane a seû l’fén èyèt a ètou yeû l’tchance d’èl rèyaliser.
Dins l’Dakar 2012, l’ome a tout d’min.me yeû deûs frèyeûs. El premîyère, c’èst quand ès’ mini a bourè in motard. L’aute aveut bloquè s’moteûr tél.mint i ‘steut s’crant. El vwètûre l’a touchè èt i s’a r’trouvè dins l’eûwe. Au gnût, èl futûr vinqueûr a stî s’èscuser mon l’ome ausès deûs rouwes.
El deuzième côp, c’èsteut à deûs djoûs di l’arivéye quand i s’a r’trouvè dins-ène cuvète woù-ç’qu’il a pièrdu n’vintène di munutes.
Es’ mèstî, lî, i l’passe dins lès vwètûres. Quand vos lîrèz m’n-ârtique, l’ome âra asprouvè in nouvia moteûr BMW dièsel di sérîye dins lès sâbes du Quatar. Min.me si on n’wèt nén voltî, dès tchampîyons come Peterhansel, lès avanc’mints tèch’niques dès vwètûres come lès nôwes ès’ font tout d’min.me grâce à yeûsses.