- Dj’é l’abutûde di vos d’vîser di grandès-èquipes ou bén di grands spôrtifs. El cén qui dj’é dècidè di vos d’vîser audjourd’hu èst seûr’mint mwins conu. Pourtant, il a bran.mint d’mèrite.
Es’ prénô, c’è-st-Oscar èyèt s’nô d’famîye, c’èst Pistorius. Es’n-ome-là èst sud-afriquain. Il a v’nu au monde à Prétoria en 1986.
Djusse qu’à r’là, rén d’èspéciâl qui vos d-alèz m’dîre. Eyèt pourtant, lès céns d’intrè vous qui wèy’nut voltî lès coûsses à pîds duv’nut conèche l’istwêre da Mossieû Pistorius. C’èst l’preumî atlète andispôrt à concouru dins-in tchampionat du monde pou djins valîdes. Myeû, il a stî l’preumî mèdayè andispôrt mon lès valîdes.
El pètit Oscar aveut à pwêne onze mwès quand on lî a côpè lès deûs djambes djusse pa-d’z-oûs lès gn.gnoûs. En 2004, i cominche a fén d’èl coûsse à pîds adon qu’i s’aveut fracturè l’djinoû au rugby. Divant ça, il aveut min.me cachi à fén d’èl boc.se.
Comint s’fét-i ? Et bén i coûrt avou deûs protèses en cârbone èyèt spéciâl’mint féte pour lî couru. Rad’mint, en sètembe 2004, i gagne ène premîyère mèdaye aus Djès paralympiques d’Athènes. L’anéye chûvante, i coure avou lès valîdes en Afrique du Sud. En 2008, èl Tribunâl ârbitrâl du spôrt l’autorisse a couru avou lès valîdes. C’è-st-adon qui dès-èspéciâlisses ont cominchî à fén dès tèsses èyèt à studî lès performances da Pistorius. Dji vos spaugne lès dètay’s. On a r’mârquè ètou qu’èl consomâcîyon d’oc.sigène èst mwins fôrte qui lès-autes coureûs.
Es’ dèpârt èst mwins râde èyèt il a pus malaudjî dins lès toûrnants.
L’IAAF a èvoyî dès mèd’céns pou fén dès-analyses techniques di cès coûsses. Gn-a yeû dès rapôrts avou dès-intèrdic.sîyons. L’ome a stî en-apèl avou dès-autès conclusîyons.
- Dji n’vos dis nén lès disputes intrè lès-èspèrts !
Lès-èspéciâlisses ont trouvè deûs-afêres di seûre. Lès m’seûres biomécaniques ènn’ sont nén lès min.mes intrè l’fôrme d’èl lame en cârbone èyèt l’pîd d’èn-ome. L’aute pwint èst fôrt impôrtant. El coureû è-st-à l’abri dès problèmes di musculâcîyon aus talons d’Achile èyèt aus molèts. Dès-afêres qui pôs’nut du trèyîn aus sprintèrs. Surtout aus-entrin.n’mints.
El pârticipâcîyon da Pistorius aus Mondiaus valîdes è-st-istorique. Qwè qui gn-aveut d’djà yeû deus cas, mins nén avou dès lames : Terence Parkin, in nadjeû sourd èyèt l’françès Salesse, andicapè d’èl mwin. Mins Oscar, on l’prind pou « Robocop ». Les sponsors es’ l’arach’nut. Pourtant, il a tout d’min.me dès lames avou dès r’sôrts èyèt pus l’longueu èst grande, pus il è-st-avantadjè. L’ome s’èst qualifiè pou lès Mondiaus 2011 à Daegu en Coréye du Sud. El dimègne matin, li stâde èsteut rimpli pou vîr lès sérîyes. Il a stî sôrti en d’mi-finâle du 400 mètes, mins a stî mèdayè pou s’pârticipâcîyon au 4 côps 400 mètes. Lès djins l’ont spotè « the Blode Runner », èl coureû ausès lames. Ene afêre qu’èst seûre, c’èst qu’Oscar Pistorius è-st-èn-ès.simpe pou lès-andicapès. Avou n’téle batâye, i done in mèssâdje d’èspwêr à toutes lès djins qui sont st-amputès à cause d’ène maladîye, d’èn-ac.cidint ou co bén min.me d’ène guère. Qwè qui, èl pris dès lames dispasse lès 25.000 Euros ! Eyèt ça, i n’faut ètou nén l’roubliyî !