Et bén v’là co ène bèlje istwêre d’amon nos-autes. Qwè qui nos n’èstîs nén méreseû à rêver lès-îs au laudje. Lès wolandès ès’ trouvit dins l’min.me batia. Saquants-omes dècideûs èyèt dès spôrtifs s’avît rachonè èyèt imajinè qui nos deûs payîs arît p’lu mète en tch’mwin ène coupe du monde.
« Du rêve », vos dis-dje ! Mins i n’faleut nén vîr pus lon qu’èl dibout d’ès’ néz pou crwêre à in tél tchapite pou l’fotbale di no payîs.
C’èst l’djusse qui nos-avîs yeû ène boune organisâcîyon pou l’Euro 2000. Mins à paurt çoulà, no payîs èsteut en crîje èyèt sins gouvèrnemint. Dès liârds, i n’d-aveut nén pus qui ça pou fén sôrti d’tére dès nouvias stâdes. Gn-a nén d’djà âssèz dins bran.mint d’domènes.
Du costè dès tchambes d’ôtèl, on-âreut d’vu fén apèl à l’France èyèt co p’tête à l’Al’magne. Bén-ètindu, nos-avons d’meurè dins lès quate dérins. Mins èst-ç’qui nos-arîs p’lu rivaliser avou l’grande Russîye ? Afôrce d’ètinde mès-omes nos l’rèpèter, nos finichîs à z-awè n’mîyète d’èspwêr. Mins à qwè bon !
El 2 di décimbe à Berne, lès 22 mimbes du comitè èc.sécutif d’èl FIFA (is sont normal’mint 24 mins deûs ont stî tapès à l’uch’ pou trich’rîye) ont dècidè qui ça s’reut l’Russîye qui ramass’reut l’pactole.
El Bèljique, l’Angletére èyèt l’Espane ont stî rèyus. Pourtant, pou l’cén qu’aveut yeû l’idéye èyèt qui r ‘présinteut l’gouvèrnemint bèlje, no payîs aveut bran.mint d’atout dins s’djè.
Vèl-cî saquantes : amon nos-autes, i gn-a l’présidint du spôrt mondîal, èl Bèljique èst l’cente di l’Europe géyografique èyèt politique, nos-avons ètou amon nos-autes èl présidint du consèy’. Etou, i n’faleut nén s’displacer en-avîyon ou co bén min.me en batia pou chûre èl coupe du monde. D’èn-aute costè, si on d’vise di liârds, i faut invèstî dins dès nouvias stâdes. Et come tout n’èst nén supôrtè pa l’public … on d’vise tout d’min.me de 10 mîyons d’Euros pou in stâde.
C’èst l’vré qu’Alain Courtois a trimpè s’tchimîje pou cachî d’convinque lès mimbes d’èl FIFA. Pa t’t-avau i sayeut di moustrer l’profèssionalisse di no candidatûre. « Lobbyng », v’là co in mot en-anglès. Parètreut qu’èl tchinisse dwèt yèsse fôrt. Surtout si on-a l-ambicîyon d’organiser yin dès trwès grands-évèn’mints d’èl planète (lès deûs-autes, c’èst l’èsposicîyon univèrsèle èyèt lès djès olympiques).
Mins tout çoulà a passè pou du vint ! El Russîye a stî r’tènûwe. Au cominch’mint, i gn-aveut quatôze payîs. Mins pou chûre, bran.mint ès’ sont r’satchî puce qui tèrtous avît l’doutance qui l’organisacîyon 2018 è d-ireut à in payîs d’Europe. Adon qui nos pârtis politiques ènn’ sav’nut s’mète d’acôrd min.me dissus dès pèt’chas, nos-ârons au mwins moustrè qui nos p’lîs nos rachoner autou d’in grand pôrdjèt.
Asteûre, nos n’èstons nén prèsse d’èr’cominchî. El tchanse è d-aléye. El cente di gravitè du monde a candjî. El cén du fotbale ètou. Lès djins di no payîs qui ratindit ène saqwè pou l’coupe du monde 2018 poul’nut brére dissus l’èspale dès fotbaleûs. Wétèz in pau à Châlèrwè, i faleut in nouvia stâde. Tout d’min.me i d’vreut yèsse fét, mins i s’ra bran.mint pus p’tit. Pou s’financ’mint, i gn-âra pont di liârds du fédérâl ni d’èl coupe du monde. Eyèt après tout, gn-aveut tél.mint di contrintes avou l’fameûs contrat qu’èl FIFA oblidjeut à chûre pou lès viles qui r’çuvît dès pârtîyes d’fotbale.
V’là tout d’min.me ène fole idéye, qui pour mi co in côp, aveut wêre di tchance d’ariver. C’èsteut in formidâbe pôrdjèt pou rachoner lès djins di no payîs. On-a quand min.me l’èspwêr qui lès « roudjes diâles » ès’ qualifîy’ront dissus l’tèrén pou yeûsses s’èr’trouver au Brésil, en Russîye, au Quatar … Mins ça, c’è-st-ène aute pére di mantche !