Nos v’là dèdjà au mwès d’décembe. Toutes lès fouyes sont tcheutes dès-âbes dispus longtimps. On lès-a ramassès à l’pèle come saquantès-èquipes ont ramassè lès pwints à fôrce di gâgnî lès pârtîyes. En fotbale come dins tous lès spôrts, i gn-a lès céns qui pièd’nut èyèt lès-autes qui gâgn’nut. Audjourd’hu, dji m’èva vos d’vîser d’ène èquipe qui touche èl fond. Comint ç’qu’on pout d’ariver là ? Tout d’abôrd, divant qu’èl séson n’cominche, on-a ègadjî in boun-entrin.neû. Il èsteut d’djà v’nu à Châlèrwè, èl Mathijssen ! Mins l’Présidint Bayat aveut yeû dès mots avou lî. Adon, i l’ratindeut au toûrnant. Saquants mwés résutats, èt hop, tapè à l’uch’.
C’èst mi qui comande, c’èst mi qui dècide. Dji seu l’patron d’èm’ n-entrèprîje èyèt mès-emplwèyès n’ont rén-à dîre !
Ene mîyète fôrt quand on sént qui Mathijssen èsteut bén vèyu di tèrtous, t’t-ossi bén dès djouweûs qui dès supôrtèrs. Djussetumint, yeûsses, is-ont mârquè leû dèsacôrd avou l’Dirècsîyon. On-a vu aparèche dès band’roles anti-Bayat. Ene gnût, is l’ont min.me mârquè dissus l’p’loûse. El djârdini a d’vu mète d’èl vète couleûr dissus lès-ièbes pou catchî l’tèc.se.
Adon, ça a stî èl sérîye di djins qu’ont quitè (ou bén d’vu quiter) èl batia qui pèrdeut di pus-in pus l’eûwe. Fén d’èl séson passéye, Tommy Craig èst tapè à l’uch’ pa Bayat. Fén avrî, Mario Notaro vout pârti mins d’meure djusse qu’à l’fén d’èl séson pace qu’i faleut ène licence d’entrin.neû dissus l’banc. En jwin, Bert de Waele dwèt rindjî s’cârculète : ène décisîyon da Bayat. El 19 di sètembe, Jacky Mathijssen èst tapè wôrs du vèstîaire. El 13 octobe, c’èst l’toûr da Dominique Henin di r’cuv’wêr ès’ C4 : in, nouvia préparateû fisique arive avou Lazlo. Pîre, Mogi Bayat, nén d’acôrd avou s’mononcque, ès’ wèt moustrer l’uch’ di sôrtîye. Dîj djoûs pus taurd, Raymond Mommens, vî sèrviteû du club, ènn’a s’sô èt pète au diâle. Cominch’mint novembe, Tecklak, à l’tièsse dès zèbrions, n’èst nén d’l-avis da Abbas èyèt s’èva ètou. L’isol’mint du Présidint choque tèrtous. Lî, i continûwe. L’ome èst quasimint mèreseû. El faute à ène stratéjîye di gèstîyon qui èfonce di pus-in pus l’Espôrting dins-ène situwâcîyon spôrtive catastrofique. A cause d’èn-ome : èl Présidint Bayat. Awè l’pouv’wêr di disloyî lès côrdons d’èl boûse done t-i ostant d’pouv’wêr ? Ene réjîyon ètîre pinse qui non. Mins èn-ome … El nouvia entrin.neû ènn’ pèrdeut nén pus d’pwints qu’l-aute. Du contrére ! Mins c’èst l’Présidint qu’l-a amwin.nè. Faut dîre ètou qui lès chifes ont tcheut.
Lès gazètîs ont seû qu’on-aveut vindu pou trwès mîyons èyèt ach’tè pou 150.000 Euros. C’èst tout ç’qu’èl Présidint aveut mètu dins l’env’lope. C’èst l’vré qu’i gn-a dîj ans, il aveut sauvè l’Espôrting d’èl catastrofe en stitchant bran.mint dès liârds. La Louvière èt Mouscron ès’ sont r’trouvès dissus leû cû sins-awè ène saquî pou lès r’prinde. Mins di d’là à djouwer avou lès pîds dès djins come i fét en dijant qu’il èst méreseû à dècider dins s’n-entrèprîje, i gn-a dès limites. Di mwins en mwins di djins èvont au stade. I gn-a d’qwè ! Vîr sès couleûrs batûwes avou dès djouweûs bran.mint trop coûrts pou l’divisîyon yin ou co bén min.me dès transfèrts qui n’ont nén co djouwès dispus l’cominch’mint d’èl séson, èst malaudjî à supôrter. El sèt di novembe, saquants djoûs après … l’Toussint, lès gades à rôyes ont atrapè in troféye dont is s’rît bén passès : èl roudje lantèrne. L’èspwêr, c’èst qu’is n’fèyîjent nén l’culbute. I gn-a d’djà wêre d’èquipes walones en divisîyon yin… Pou cominchi l’deûsième toûr, l’èquipe a stî à Malaga. Ca pou candjî n’saqwè ? Faut vîr !