Nos schoûtans pol deujhinme côp (rilijhoz vosse Rantoele 89) Dimitri Françwès, ki s’ mestî dispu ses djonnès anêyes, c’ est d’ ramasser çou k’ les ôtes tapèt ås riketes.
K’ il est lon, li tins des « trôs ås nichtés », cwand les djins ‒ des pôves, mins eto des djins bén metowes ‒ alént « fé les poubeles » li dimegne del vesprêye. C’ esteut dins les anêyes 1970, pask’ e 1985, on a clôs ces « gadous » (distcheyaedjes e l’ air libe) la.
Les mannestés d’ måjhon estént ramassêyes tos les djudis pa èn ome avou des tchvås et on tchår, u avou on vî camion do tins del guere di catoize. Télmint vî ki, cwand i rdemaréve, il efouméve tot l’ coulot.
Mi famile esteut bråmint po ramasser les metås. Li fier, come di djusse. C’ est çk’ i gn aveut l’ pus, mins on l’ leyive po onk di mes cuzéns. Mi grand-pere, c’ esteut l’ keuve, l’ aluminiom et l’ inocs (ci n’ est nén do fier : ça n’ prind nén a l’ inmant). Mi mononke, i n’ purdeut ki l’ plonk.
Minme nosse prumire tévé, ene Téléfounken, vineut d’ on distcheyaedje.
Adon, li londi, après scole, on broûléve les cåbes po aveur li keuve peur. Après l’ awè broûlé, on l’ rixhorbeut co avou des viyès lokes. Li mårdi, todi après cwatre eures, on fondeut dins des casroles d’ inocs u di scroufier. Cwand l’ plonk esteut rafroedi, on rtournéve li tchôdron. Les cis d’ inocs si vudént åjheymint di leu blokea d’ plonk. Les cis di croufier, i les faleut sketer avou on mårtea po displaker l’ plonk. Gn aveut onk dilé nozôtes ki fondeut dins on tchôdron d’ keuve (come les cis k’ on pindeut å crama dins les feus a l’ aisse). Dji m’ è sovén : il esteut tot cabouyî. I l’ diveut seur ricandjî tos les moes.
Nozôtes, les efants, on amoennéve les bokets a broûler, et on aveut bon di rwaitî les belès blames di totes les coleurs (pol keuve). Et pol plonk, on trovéve ki ça odéve bon. Gn aveut l’ odeur, mins gn aveut ossu l’ rafiya d’ awè ene dringuele.
On l’ meritéve bén, ca so l’ semdi et l’ dimegne di l’ après-nonne, on fjheut les poubeles di cénk viyaedjes, li pus lon a doze kilometes. Avou l’ viye « deus-tchvås » di m’ mononke ki tanfléve padecôp e-z eralant, télmint k’ elle esteut bôguieye.
On n’ s’ a djamåy doté ki, tins k’ on broûléve li plonk, ki fouméve ki l’ diåle, gn aveut des ptitès barbôjhes do metå ki s’ alént tchôkî dins nosse peumon. Ci n’ est k’ a l’ ådje di 40 ans k’ on docteur, tot loucant ene di mes radios, a stî sbaré di vey totes ces ptitès taetches la so l’ imådje
On a trové trinte-shijh meyes manires di relére les riketes. Po cmincî, avou des saetchs di diferinnès coleurs. Mins fåt k’ ça soeye les djins ki metexhe tchaeke trigu dins on saetch diferin. Adon-pwis, gn a yeu les poubeles ås deus batchs : d’ on costé, les ansinåves et did l’ ôte tot l’ restant. Après, il a falou mete a pårt les mousmints et les botayes. Les blankes d’ on costé, les vetes di l’ ôte, et les « plats veres » co ôte pårt).
A pårti des anêyes 1990, on a yeu les « ralouwaedjes » u « parks ås contners ». La on pleut dispårti : l’ electrike, les papîs, les bwès, les yebes et les coxhes, les pneus, les prodûts tchimikes, les ôles (di friteure et d’ gåraedje), li frigolite, les fiermints, et tot ça. Çou ki n’ aléve nén dins on contneu esprès esteut hiné dins les « ehalants d’ manaedje ».
Et dispu les anêyes 2000, les comenes ont dvou fé bouf ådfwait des costindjes et des rintrêyes po dihaler les djins d’ leus riketes. C’ esta l’ atuze do « pris-verité ». Ey adon, el facteure a monté a gritchete. Å cmince, c’ esteut facturé å kilo ramassé. Pu après, li grosse pårt esteut å forfwait, tantea k’ dj’ a veyou des facteures di 210 uros po 500 grames rascodous so tote ene anêye. Fåt dire ki c’ esteut ene deujhinme dimorance avou ene sitouve å bwès ki dihaléve les djins des cwårtons et papîs d’ ewalpaedje, èn ansinî d’ plante la k’ les peletes et les trigus biyos alént, et les boesses d’ amagnî d’ blanc fier, canetes eto, k’ estént wårdêyes po bibi. Ca dj’ a rataké a ramasser les fiers, come do trevén di mes djonnès anêyes.
Lanawaire, totes les ewalpeures di papî, di plastike et d’ metå ni polèt pus aler, ni dins les dobes batchs, ni direk ås parks ås ralouwaedjes. Les fåt herer dins des bleus saetchs, k’ on doet co atchter, et ki n’ sont ramassés ki zels tos seus, onk u deus côps par moes, pa ene grosse societé.
riscrît li 10 di decimbe 2021