C’ est nén del pitite bire di scrire so ene guere k’ est e rote, dabôrd k’ on n’ serè léjhou ki dins on moes, et co hay. Mins, houte do toledjoû, waitans çou k’ sacwants waloneus nos ont dit sol sudjet.
Bernard Diez (copinreye di Libin) : Por lu, çou k’ on-z ôt al tévé, c’ est del propagande. On n’ pout nén dire k’ i sont etur les deus bateus. Les gaztîs d’ asteure ni sont pus des vraiys gaztîs. Ça repete tot çk’ on lzî dit d’ dire. Dji n’ so nén pol guere. Mins on cåze åd triviè d’ tot sins waitî çou k’ onk a dit et çou k’ l’ôte a dit. On pinse todi ki l’ Poutine, c’ est on guerî. I vout rfé l’ URSS. On roveye todi ki l’ Amerike, c’ est l’ OTAN. Et, a pårti do moumint ki l’ URSS a stî sketêye, l’ OTAN a sayî ‒ et a reyussi a s’ edjîstrer di tos les costés. Et sovint, i payèt po çoula. Pocwè k’ les ancyins payis d’ l’ Ess ont tertos volou rintrer dins l’ OTAN ? Po èn interesse financî. I n’ tént k’ a zels. Mins si Poutine n’ est nén dacoird, i doet poleur responde. Gn aveut les acoirds di Minse (Minsk) (ki dmandént on statut a pårt po les provinces dislaxhiveuses, djamåy vôté pa Kiyev) et des pus vîs acoirds, ki rmontént å distrujhaedje do meur di Berlin. Çou ki m’ taene li cur, c’ est k’ on n’ è cåze djamåy. U a schipe (a poenne). Dinltins, on a yeu des bons gaztîs a l’ RTBF, ki respectént les idêyes des deus costés. Ci n’ est pus l’ veur asteure et dji n’ so nén l’ seu a l’ dire.
Pablo Sarachaga (Li Rantoele) : Les pûnixhaedjes economikes pôrént bén esse come onk ki soye li coxhe k’ il est ashiou dsu. Li comiece del Rûsseye continouwrè avou les payis nén uropeyins. Mins i n’ si frè pus e dolårs u e-n uro. Et ça n’ pasrè pus på discandjoe SWIFT, mins på parey-a-lu chinwès, li CIPS. Les payis do Coûtchant piedront leu mwaistrijhe do sistinme financî eternåcionå.
Luc Marchal (copinreye di Libin) : Zelenski a stî tchoezi democraticmint. Dire ki c’ est des nazis ki moennèt l’ Oucrinne, c’ est ene miete sibarant, ca Zelenski, lu-minme, c’ est on djwif. Avou ça k’ i gn a nou candidat d’ foite droete k’ a passé ås dierins vôtaedjes. Nén onk.
Zahra Aimad (situdiante efuyeye) : Dji studyive a Kiyev (Kyiv e-n oucrinnwès) dispu deus ans (deus ans d’ corona). Li djudi 24 å matén, dj’ a-st oyou kékes bruts d’ petaedje, mins rén. Del djournêye, tot esteut normå. Li vénrdi, ç’ côp la, ça cmincive a caberdouxhî dins nosse coulot. Et les hoûlåds ni s’ djoként nén. Ça sinteut vormint l’ agnon. Avou des ôtes parey·e·s a mi, on a decidé di steper evoye. Avou kékes cayets dins on saetch di spôrt. Les tréns estént po rén. Oyi, mins faleut poleur moussî dvins. C’ esteut bôgyî. Dji vos è dirè dpus l’ côp ki vént.