Gn è des gros spès nouwadjes k’ aspitèt dud låvå
Bèrôlant yink su l’ôte, a tout machèrant l’ cîr
Nwarichant la clêrté dou djoû. Et mi dj’ ê må
Et taper al duloûje, ca dju m’ sin ètrandjîr.
Etrandjîr et prîjnî, al gayole du m’ payi
Ûsku m’ lingadje èva dul boutche du nôs roufions
L’ î rutchôcrans dj’ in djoû ? Dju su ène tchawe-sèri,
Ki cavole d’ hâre et d’ hote, et ki s’ buke ou plafond
Adon, d’in seul randon, gn è des clotches ki sounèt
Leu p’zant andjlusse ; c’est non.ne ; bin nèni, c’ est mîgnute
Cand des pépés, des diâles, et l’ verbouk catoûrnèt
Tout beûrlant din ma tiêsse. Et dmwin srè coume ènute.
Ça fwêt ku dj’ bache la tiêsse, dône du leu trèchulriye
Sin pupont d’ rafiya, dju lzî dène mes espwars
K’ i hapèt, k’ i strindèt, a tout mon.nant leu viye
Et pu k’ i rustitchèt, a francès, a m’ mémware.
sucrît lu 13 d’octôbe 2000, din l’ airance d’ in vinrdi 13 tout nwar et machèré.
Aprume, li tecse shût l' idêye do rimea l° 78 del ramexhnêye «Spleen» da Baudelaire, ki cmince pa «Quand le ciel bas et lourd pèse comme un couvercle»; mins li discatibulance divént rade li cene do scrijheu divant l' dicwelaedje do lingaedje walon.
eplaidî ciddé so l' Aberteke, avou ene ortografeye ene miete ricandjeye; li tecse cial ådzeu, c' est li scrijha do mwaisse tapuscrît.