Gn a des gros spès nouwaedjes k’ aspitèt did låvå
Bèrôlant onk so l’ôte, è tot maxhurant l’ cîr
Noerixhant li clairtè do djoû. Et mi dj’ a må
Et taper al diloûjhe, ca dji m’ sin ètrindjîr.
Etrandjîr et prîjhnî, din l’ gayole di m’ payi
Wiski m’ lingaedje èva dèl boke di nos roufions.
L’ î ritchôcrans dj’ on djoû ? Dji so-st ène tchawe-sori,
Ki cavole d’ håre et d’ hote, et ki s’ buke å plafond.
Adon, d’on seul randon, gn a des clotches ki sounèt
Leu b’zant andjlusse ; c’est non.ne ; bin nèni, c’ est mèynute
Cwan des pépés, des diâles, et l’ verbok catoûnèt
Tout boerlant din m’ pôve tiêsse. Et dmwin srè coume ènute.
Ça fwêt ku dj’ baxhe el tiesse, dône di leu trèxhelreye.
Sin pupont d’ rafiya, dju lzî dène mes espwèrs
K’ i hapèt, k’ i strindèt, è tot minant leu veye,
Et pu k’ i ristitchèt, e francès, din m’ mémwere.
sucrît lu 13 d’octôbe 2000, divins l' airance d' on vénrdi 13 tot noer et maxhuré.
Aprume, li tecse shût l' idêye do rimea l° 78 del ramexhnêye «Spleen» da Baudelaire, ki cmince pa «Quand le ciel bas et lourd pèse comme un couvercle»; mins li discatibulance divént rade li cene do scrijheu divant l' dicwelaedje do lingaedje walon.
eplaidî cial so l' Aberteke (dierin rapontaedje 2004) (avou co des candjmints ortografikes); li tecse cial ådzeu, c' est li scrijha do mwaisse tapuscrît.