I.
Dispièrtez vosse walon, il èst timps
C’è-st-on ritche èritadje dès parints.
Rèspleû
Co dins nosse tièsse,
Fians l’ passer à nosse djon.nèsse,
Sauvans l’ walon, lingadje di nos tayons.
II.
Nos mots sont sovint come dès imaudjes
Qui nos rindneût afîye bin binaujes.
On vêre qui toume à l’ têre èst spiyî,
Mins l’ bioke qu’on rote dissus èst spotchîye.
au rèspleû
III.
D’one comére trop curieuse vos trovez
Qu’èle dwèt soyu l’ ponu èt l’ cové.
Onk qui faît n’impôrte qwè arindje tot,
Come dès gayes dissus on baston, qué bia spot !
au rèspleû
IV.
Onk qu’èst ossi spès qu’on spingurlèt
Va manquer d’ toumer flauw ossi rwèd.
On grand, c’è-st-on dispindeû d’ gayole
Li ci qui scrote dès liârds va è l’ piole.
au rèspleû
V.
C’èst quand lès bèguènes alin.n mèchner,
Vout dire qui ça n’ s’a jamaîs passé.
One pitite saqwè d’ pus, c’èst l’ rawète,
Mins si ça n’ va nin bin, c’èst bèrwète.
au rèspleû
VI.
Mi dj’a mès pîds come dès grognons d’ tchin,
Dji m’ djoke adlé li stûve bin rademint.
L’ pus laîd dès vias, si mame li ralètche.
Si vos m’ vèyoz voltî d’nez m’ on bètch.
au rèspleû
VII.
Dauborer, ragadler, ploviner,
Sbarer, mwinrner, gnawler ou tchicter.
Dispièrtez vosse walon, il èst timps,
C’è-st-on ritche èritadje dès parints.
dérin rèspleû
Co dins nosse tièsse,
Fians l’ passer à nosse djon.nèsse.
Sauvans l’ walon, lingadje di nos tayons.
Sauvans l’ walon, èritadje dès tayons.
Scrît sol tipetape d' ene tchanson d' Gainsbourg « La Javanaise »