Li mårdi 8 di nôvimbe 2016, a cénk eures del vesprêye, dji m’ rissovna k’ on sav dedja, dispu å matén, kî çk’ aveut wangnî les vôtaedjes estazunyins.
Nén dtrop axhåré, èn ome. Li dimegne, dj’ aveu-st oyou ki l’ feme Clintone aveut co cénk ponts d’ avance divins les ploncaedjes. Dji m’ atindeu a ene grosse dobleure po Trompe, a môde del cene di s’ camaeråde di lisse divant Obama, la cwatre ans did ci. Les Amerlokes n’ alént tolminme nén relére onk k’ est disconte des comeres, des noers, des Latinos, des muzulmans. Cwè çk’ i dmeure co, cwand t’ as rsaetchî tot ça ?
Dj’ a bén manké d’ toumer d’ ene astårdjeye cwand dj’ a-st oyou l’ novele : « Li cia k' a wangnî, c' est Don al Trompe. »
Les binåjhes
Ene contrumasse di djins fourît disbåtchîs. Mins end a ki n’ veyèt nén d’ on trop mwais ouy l’ arivêye d’ on sfwait halcotî al tiesse do pus pouxhant estat del Daegne. Les prumîs a-z aveur evoyî des proficiates, ça a stî les prezidints do Bouroundi et do Gabon. Ti sins bén ! Les democrates volént stitchî leu nez tocosté et pûni tos les moenneus afrikins ki frawtinèt avou leus peupes. Asteure, ki les dictateurs des zivercôfs touyexhe et brouyexhe come ça lzî dût. Donal, lu, s’ vout ocuper des Amerlokes d’ Amerike, et rén d’ ôte. N a minme on pont la k’ il est d’ acoird avou l’ Obama : li guere di Libeye, decidêye pa les EU, li France et l’ Inglutere sins l’ åjhmince di l’ ONU, ça a stî li pus grande ratournêye politike des deus mandats Obama. Donal vôreut ramoenner les oujhenes k’ ont stepé evoye å Mecsike avou l’ ALCAB. Lacobén k’ on n’ a pont fwait d’ acoird Urope-Amerike, ca il åreut falou racmincî a rén.
Tot foû scwere k’ il est, s’ i parvént a fé rtourner l’ vierna do mondiålijhaedje såvaedje, ki fwait les gros todi pus ritches et les ptits todi pus pôves, il årè wangnî ene bele djournêye po nos efants. Tant k’ il î est, i s’ pôreut eto rsaetchî d’ l’ OTAN, et leyî les Uropeyins divni omes zels tot seus, sins leu grand fré Djancaisse po tni l’ tchandele.
Mins, po-z enonder ci grand rivnaedje di bata [retour du balancier] la, fåreut k’ les gros-plin-d’-cwårs soeyénxhe avou lu. Et, come tins del paskeye Obama-moutouwele [Obama-care], i n’ årè cåzu rén a dire disconte l’ eståvlixhmint.
sicrît li 13 di nôvimbe.
Sol minme sudjet:
* Sacwants tuzaedjes d’ après les eleccions « made in USA »
* L’ Amerike n’ est pus çou k’ elle esteut