On dët : « Damadje a todë tot ! »
C’è-st-one maujo qu’a stî manquéye
C’è-st-on faus plë din-r-on paletot
C’è-st-one chëte d’aronde aplëquéye
Së l’ nez d’onk que r’waîteûve è wôt.
S’on n’èst nén t’-t-a-faît ç’ qu’on dwèt ièsse
Damadje qu’on n’èst nén pus malén
Mwints côps qu’on n’ sèrot nén së bièsse.
Në sèrot-ç’ quë d’lé-r-on molén
Sèrot-ç’ quë d’lé-r-on molén
Trop près d’ l’éle on va stëtchë s’ tièsse.
Vola m’ tchapia d’ sôye è fossé
Ou bén c’èst m’ solé quë s’ dëslôye
Èt quéquefîye s’on-èst trop prèssé
C’èst l’ maîsse boton qui pète èvôye
Vêcë c’è-st-on cârau câssé
Trwès-invëtâcions po l’ min.me djoû,
C’è-st-on guignon ! Cor on damadje !
Èt m’ tchapia n’ më dët nén por ou
Djë fros mia dè m’ mète à voyadje
Dj’ goberos mia deûs djènes din-r-on-ou.
 qué damadje, mi chére amîye
Li pôve gârçon è-st-assoti
Ç’ qu’on n’a jamaîs veyë d’ la vîye
S’ë n’è r’vént nén il èst foutë
Mamesèle n’ètind nén qu’ë l’ marîye.
Por one mënëte on manque së trén
C’èst ç’ qu’arëve à tot quî qu’ voyadje
Mins s’on-è-st-one miète èwaré
On broke è l’ male : adieû s’ vëladje !
Faut fé l’ toûr do monde po rintrer.
Monsieû, qu’ n’èst nén dès pës mëdones
Au pôve quë d’mande lë charëté
Dët qu’l a rovî s’ boûsse è s’ maujone.
C’èst bén damadje ! Mins po s’ vanter
Ën-a qu’ lë quë sét fé l’aumone !
Damadje dë ièsse bossë, chalé
Dë ièsse rabolté, dë ièsse bwagne
C’èst min.me damadje dè ièsse pèlé
On-a tote l’aîr dë ièsse on bwagne
S’ on n’a nén « damadje ! » quë vént d’lé.
— « On leup : rén d’ bon ! » dë-st-ë Vërjîle
— « Ç’a stî damadje dë tos lès timps
« Po lès djins d’èsprët, po lès djîles
« Èt sërtout po lès mau-contints,
« Po l’ cia quë braît, po l’ cia quë pîle. »