Vla des meyes et des razans, nosse planete a skepyî d’ ene cabouxhreye ki nos n’ avans djamåy etindou, po sclater totes les lumrotes do stoelî.
Il a co falou des meyes et des razans d’ pus, po k’ des sûtis d’ ådjourdu saynuxhe d’ el comprinde et wadjî dsu les tchances di trover l’ fén mot.
Tolmonde sait bén ådjourdu ki tot çk’ egzistêye est fwait avou des atomes et ki zels-minmes sont fwaits avou des tot ptits electrons, ki balzinnut sins rlåtche åtou d’ on niyåd, ene miete come les planetes åtou do solea. Ci n’ est nén totafwait come ça, mins ci n’ est k’ po vos mostrer l’ imådje.
Cwand on rmete les berces ås nis dins les bouxhons, k’ on rawaite les imådjes åd triviè d’ on microscope ås cenes ki l’ NASA trouve avou leu telescope Uber, vos n’ sarîz fé ôtrumint ki d’ esse djondou pa li rshonnance do pus ptit atome di vosse coir avou l’ grandeur di çk’ i s’ passe dins li stoelî.
Estant gaméns, nos aléns a l’ côpe å bwès avou nosse pa, abate des åbes a l’ riceprece, soyî les buks a bwejhes, redjårber les coxhes a fagots dsu ene gade. Li pus plaijhant d’ nost ovraedje, c’ esteut d’ ramasser les coxhetes, les legnes, ki nos ramonçléns a veyates po nos pleur ritchåfer, et cure nos canadas dins les breujhes.
I n’ fåt k’ deus pires k’ on bate eshonne po trover l’ feu. I n’ fåt k’ ene tote pitite sipite po-z aloumer on feu d’ diåle. Razouyîz bén vosse feu : les bleuwès blames, les pus tchôdes, magnnut l’ bwès; i reupele. Les rodjès blames si solevnut avou les fumires et les scrabeyes pour s’ aler piede dins l’ berdelaedje do vint.
Comint n’ nén rmete ça a çki Uber (NASA) nos mostere ?
Asteure, dji m’ vos va dire li minne : so nosse tere, on s’ cotape a nonsyince come ene banslêye di molons. I nos fåt dmorer tot simpe. Nos estans si télmint ptit ki ns vicans so l’ pus ptite des scrabeyes.
Rimetoz on dierin côp tot ça a çki s’ passe dins li stoelî.
Li scrabeye ewou k’ nos vicans, ci sereut bén nosse solea. Et l’ ci k’ est l’ pus près dè l’ nosse, i fåreut ddja moenner roed, des anêyes å long a l’ vitesse del loumire, po l’ trover.
Çi n’ est nén possibe di s’ fé ene idêye del grandeur ki l’ feu k’ a stî aloumé doet awè. C’ est co bén pus sbarant di s’ fé ene idêye del grandeur des mwins k’ ont dvu buker les cayôs d’ ewou ki l’ blawete a potchî.
Gn a-t i vormint ene sakî padrî tot ça ? Est çki les cayôs ont tchai foû d’ ses mwins pask’ il aveut l’ balzin ?
Dins tos les cas, si vos l’ rescontrez on djoû, ni mel vinoz nén prezinter. Dji n’ mi såreu rmete å pus ptit d’ ses atômes. Et portant, dj’ end a come lu, mins ci n’ est nén lu, grand ådla, ki s’ va trecassî d’ ene faflote ashîte dissu ene escrabeye ki s’ rafroedit.